Boahtte ja maŋit vahkku leat riikaviidosaš dutkanbeaivvit. Dan oktavuođas galget ollu iešguđetlágan doalut Sámi allaskuvllas.
Dán jagáš riikaviidosaš dutkanbeaivvit leat 16.–27. beaivvi čakčamánus. Sámi allaskuvla lágida ollu doaluid, ságastallamiid ja logaldallamiid. Juoigan- ja luohtefáttá ságastallankafea áigu Liv Inger Somby jođihit. Kafeas galget earret eará guovdilastet makkár mearkkašupmi juoigamis lea olbmo dearvvašvuhtii, identitehtii, giela ja kultuvrra seailluheamis. Muđui galget maid livestreamejuvvon gáffebuddu nammasaš logaldallamat dollot, main iešguđetlágan dutkit logaldallet.
Dutkanbeivviid festivála lea lágiduvvon 1995 rájes ja lea oktain Eurohpá stuorimus dutkanfestiválain. Festivála hástá buotlágan dutkan- ja máhttoásahusaid searvat, čajehan dihte ásahusaid doaimmaid almmolašvuhtii. Váldoulbmil festiválain lea čalmmustahttit dutkama ja dan máhtu. Dán jagáš dutkanbeivviid fáddá lea jierbmi.
