Romssas ja Finnmárkkus lea spiinneerttet olbmuid jiellatborramuš juovllaid. 45 proseantta vástidit ahte áigot bassit spiinneerttega juovlaruohta.
Eanaš norgalaččat borret spiinneerttega juovlaruohta. Nu lea maiddái riikka davimus fylkkas. 45 proseantta romsalaččain ja finnmárkulaččain plánejit borrat spiinneerttega juovlaruohta, čájeha MatPrat iskkadeapmi man YouGov lea čađahan.
Muđui vástida 32 proseantta ahte áigot málestit sávzza boahkkeerttega juovlaruohta, guhtta proseantta áigot borrat lovttaguoli, 5 proseantta ráhkadit iešguđetge borramušaid, dahje «koldtbord», nu go dadjet dárogillii, ja vihtta proseantta borret vegetárabiepmu.
Borramušvierut dat mearridit maid olbmot guossohit ja borret juovlaruohta. 30 proseantta romsalaččain ja finnmárkulaččain dadjet ahte borret biepmu masa leat hárjánan ovdalaččas, ja 29 proseantta ges vástidit ahte leat ieža ásahan borramušvieruid.
Borramušvierut
– Dološ árbevierut leat dehálaččat go ávvudit juovllaid, nu ahte ii leat hirpmahuhtti go olbmot válljejit borrat ja guossohit seamma juovlamállásiid maiguin ieža leat bajásšaddan. Vaikke mii fievrridit viidáset juovlavieruid, de leat maid hui oallugat geat háliidit ásahit iežaset dábiid ja dalle válljejit dan masa liikojit buoremusat, čilge MatPrat-goahkka Cecilie Maske.
23 proseantta oainnat vástidit ahte ieža válljejit maid málestit juovlaruohta, 17 proseantta dadjet ahte váhnemat mearridit maid borret ja 12 proseantta ges válljejit borramuša dan ektui geaid leat bovden mállásiidda. Dušše guhtta proseantta vástidit ahte vuoni dahje vuonesássa vállje juovlaborramuša.
– Go máŋga buolvva ja ođđa bearašlahtut ávvudit juovllaid ovttas, de leat iešguđetge sávaldagat olbmuin. Danin válljejit muhtimat gohkket moadde šlája juovlaruohta, ja earát ges málestit iešguđetge juovlaborramušaid eará juovlabeivviid, lohká Maske preassadieđáhusas.
