Odne, suoidnemánu 22. beaivvi lea ovcci jagi terrorfalleheami rájes Utøyas ja ráđđehuskvartála vuostá.
Mii fertet juohke beaivvi rahčat daid árvvuid dihte maid terrorista áiggui bilidit, deattuhii stádaministtar Erna Solberg sártnistis suoidnemánu 22. beaivvi čalmmustahttimis.
– Mii geardduhat sániid “ii goasse šat” muittuhandihte iežamet lohpádussii maid bijaimet – ahte galgat juohke beaivvi bargat daid árvvuid ovddas maid terrorista áiggui bilidit. Suoidnemánu 22. beaivi muittuha min ahte heakkat sáhttet massojuvvot jus vaši ii vuostálaste, logai son sártnistis, gos maid čujuhii diimmá dáhpáhussii go Philip Manhaus gottii iežas oabbábeale ja fallehii muhtin moskéa.
Hehttet historjjá fas dáhpáhuvvamis
Stádaministtar deattuhii dehálašvuođa dan barggus ahte hehttet historjjá geardumis.
– Mii diehtit ahte sánit maid dajat vašiin, konspirašuvnnat ja amasballu ellet Norgga servodagas. Dalle leat sánit maid geavahat, erenoamáš dehálaččat, lohká son.
– Fertet dahkat dan maid sáhttit hehttendihte historjjá geardumis. De fertet muitalit fallehemiid birra. Mii fertet ságastallat. Ja mii fertet digaštallat, lohká Solberg.
