Dáiddastipeanda juolluduvvui Guovdageaidnulaččaide Peter Rustii ja Marja Bål Nangoi. Guovdageainnu silbačeahppi illuda, go beassá bidjat eambbo návccaid dáidagii, iige duššo gávpegálvvuid ráhkadit.
Dáiddastipeanda juolluduvvui Guovdageaidnulaččaide Peter Rustii ja Marja Bål Nangoi. Guovdageainnu silbačeahppi illuda, go beassá bidjat eambbo návccaid dáidagii, iige duššo gávpegálvvuid ráhkadit.
Finnmárkku fylkkasuohkana kultuvra- ja johtaluslávdegoddi juolludii ikte dáidda- ja filbmastipeandda guovtti Finnmárkku dáiddáriidda. Dáiddár Peter Rust oaččui 100 000 ruvnno dáiddastipeandda ja filbmadahkki Marja Bål Nango oaččui 75 000 ruvnno filbmastipeandda.
Ii leat vel čielggas makkár dáidda šaddá
Guovdageaidnulaš Peter Rust lea giehtadáiddár ja gollečeahppi, ja lea ožžon govva- ja giehtadáidagiid bargostipeandda. Son lea oahppan gollečeahppi ja lea badjelaš golbmalogi jagi hálddašan iežas báji. Son lea maid hui mearkkašahtti giehtadáiddabirrasis. Stipeandaáigodat lea golmma jagi badjel, 2016-2018 rádjai, ja son oažžu 100 000 jahkásaččat. Dáiddár ii loga alddis vel čielga jurdaga maid áigu ráhkadit.
— Dán barggus in galgga dárbbašit jurddašit gávpeládje, ja de boahtá dát stipeanda lea friijaoastinortnet vuoi beasan bargat dáidagiin nu go háliidan. Dat šaddá earálágan go dat mii rámbuvrras lea, mat leat juohkebeaivválaš- ja gáktečiŋat. In dieđe vel šaddá go silbadáidda obanassiige. Soaittán oažžut jurdaga masa ii heive silba, muhto baicca eará ávnnas. Iige leat daddjon ahte šaddet čiŋat ge, muhto áibbas eará. Mus leat olu jurdagat, ja dál beasan gávppi bidjat veaháš eret.
Bargu ferte láddat
Rustii lea rápmi oažžut dán stipeandda, ja lohka dan dego dohkkeheapmin su barggus.
— Dál ferten jurddašit gosa áiggun dáinna, dál easka šattai duohtan go ožžon stipeandda. Vuođđojurdda gal lea sajis, muhto in dan gal sáhte almmuhit, dat lea čiegus, dadjá son ja reaškkiha.
— Mus leat moadde jurdaga, muhto fertejit láddat. Inspirašuvnna vieččan iežan eallimis. Lean eallán muhtun jagi, ja ollen jurddašit. Olmmoš han čoaggá muittuid ja deaivvada ain ođđa áššiiguin. In leat vel mearridan makkár dáidda galgá leat, dat lea guhkit proseassa, muhto mus lea buorre áigi bargat dainna.
— Dáidagis lean áibbas friddja
Silbarávdi orru iešalddis hui friddja bargu, gos beassá iešheanálaččat ráhkadit dáidagiid ja kreatiivvalaččat jurddašit, muhto ii leat álo nu Peter Rust mielas.
— Mu bargu lea dáidagiid ráhkadit, muhto mun earuhan veaháš dán guovtti oasi. Giehtadáidda lea eambbo čadnon oastái. Mu bargu de lea duhtadit oasti, ja de lea su jurdda guovddážis. In boađe jurddašit gávpeárvvu go barggan dáidagiin, baicca iežan ovdanbuktima. Dáidagis lean áibbas friddja, ja leat duššo mu jurdagat mat bohtet ovdán. Lea dieđus somá jus liikojit dáidagii, muhto dat ii leat oaivil dán barggus loahpa son.
Filbmastipeanda Bål Nangoi
Mázelažžii Marja Bål Nangoi juolluduvvui filbmabargiid bargostipeanda, mii lea 75 000 ruvnno. Son lea njeallje jagi vázzán filbmaoahpu, ja lea aitto álgán filbmabargguin Finnmárkkus. Kultuvra- ja johtaluslávdegoddi oaivvilda ahte Bål Nango lea produktiivvalaš filbmadahkki, ja viššalis ja buorre lasáhus davvi Norgga filbmabirrasii.
Filbmastipeanda lea duššo ovtta jahkái, go son gii diibmá oaččui stipeandda lea fárren olggos Finnmárkkus.
