Sámediggi sávvá Romssa valáštallansearvái (TIL) olu lihku Riektesihkarvuođabálkkašumiin.
TIL lea okta guovtti Riektesihkarvuođabálkkašumi vuoitis dán jagi, ja oažžu bálkkašumi earret eará iežaset barggu ovddas sámevaši vuostá.
– Dán bálkkašumi gal TIL ánssáša. TIL lea ovdavázzi sámi giela ja kultuvrra positiiva čalmmustahttimis, ja barggus sámevaši vuostá. TIL lea stuora ja nanu aktevra Davvi-Norggas, ja lea stuora dadjamuš go TIL čalmmustahttá sámevuođa ja ovddida nu čielga oaivila sámevaši vuostá, nu go TIL lea dahkan go lea leamaš njunnošis RomsaDál-kampánjas, čállá sámediggeráđđi Runar Myrnes Balto (NSR) Sámedikki Facebook-siiddus.
Juogada bálkkašumi
Riektesihkarvuođabálkkašumi lea Norgga juristalihttu ásahan. Jury ákkastallama mielde de oažžu TIL bálkkašumi iežas barggu ovddas go váldá servodatovddasvástádusa sihke báikkálaččat, našuvnnalaččat ja riikkaidgaskasaččat. TIL juogada bálkkašumi spábbačiekčanpresideanttain Lise Klavenessain.
