Meteorologalaš instituhtta lea almmuhan dálkedieđáhusa Nordlándda, Romssa ja Finnmárkku riddoguovlluin, ja Stáhta geaidnodoaimmahat ávžžuha iskkat dálkki ja siivvu ovdal go dollet mátkái.
– Min čielga ávžžuhus biilavudjiide, geat áigot biillain vuodjit dán vahkkoloahpa, lea iskkat makkár dálki ja siivu dieđihuvvo ovdal go čavget mátkái. Iska dálkedieđáhusa, 175.no siiddu ja kámeraid mat gávdnojit muhtin luottain, vai lea diehtu mii soaitá leat vuordimis, ávžžuha Geaidnojohtolatguovddáža Siril Veiåker.
Dieđit jus gárttat dálkái
Áigi jándoris go čavget mátkái sáhttá maid váikkuhit vuodjimii.
– Muitte ahte dálki ja siivu sáhttá jođánit rievdat, vaikko lea njuoskkas ja bivval beaivet, de sáhttet buolašceahkit leat eahkedis ja sáhttá bihccut ijas. Jus vánddardat árrat dahje maŋŋit jándoris, de lea deháleappot ráhkkanit dálvesiivui. Jus fáhkka gárttat dálkki sisa, de bisan ja dieđit midjiide jus siivu addá hástalusaid, vai earát ožžot ávkki dan dieđáhusas, lohká Veiåker.
Biilavuoddji ovddasvástádus
Lea biilavuoddji ovddasvástádus ahte lea ráhkkanan nu ahte deahkat leat sadjagasas ja ortnegis.
– Go leat biilavuoddji de lea dus ovddasvástádus jurddašit sihke iežat ja earáid sihkkarvuođa birra. Sáhttá mannat bures unna mátki vuojestit geassedeahkaiguin. Geassedeahkat doibmet buorebut njuoskka luottain go dálvedeahkat, muhto jus áiggut vánddardit várreguovlluin, gos sáhttá leat dálvesiivu, de fertet árvvoštallat lonuhit dálvedeahkaide, lohká Davvi-Norgga olgodárkkistusa jođiheaddji Helle Torill Sandvik.
Dál dárkkistit deahkaid
Stáhta geaidnodoaimmahat lea olgun birra jagi dárkkisteame olbmuid vuojániid.
– Dál go dálvi lahkona, de lea lunddolaš dárkileappot dárkkistit deahkaid. Dat ii guoska dušše stuora fievrruide, muhto dábálaš vuojániidda maid. Mii sávvat buohkaid dearvan ollet gosa leat jođus, lohká Sandvik.
