Norgga čázádat- ja energiijadirektoráhtta (NVE) čállá ođđa raporttas ahte dálkkádatrievdamat sáhttet buktit stuorra hástalusaid. NVE lea kárten ja árvvoštallan guđemuš čáhcebuođut leat rašimusat ja guđemuš buođuid ferte vuoruhit sihkarvuođa dihtii.
Máilmmiviidosaččat luoddanit ja luitet gaskamearálaččat gaskal 2 ja 3 čáhcebuođu jahkásaččat, ja olu olbmot sáhttet duššat dan geažil. Norggas ii dáhpáhuva dat nu dávjá. Stuorámus čáhcebuođu lihkohisvuohta lei Kobberdammenis, Troandimis 27.05.1791 gos 22 olbmo dušše. Ođđasut áiggis eai leat olbmot duššan. Stuorámus čáhcebuođu lihkohisvuođat ledje Roppadammenis Gausdal báikkis 17.05.1976 ja Storvatnis Mátta-Várjjagis 30.05.1979:s.
Muhto Norggas leat olu čáhcebuođut mat sáhttet vahágahttit stuorrát jus luitet. 1981 rájes leamaš Norggas sierra čáhcebuođđosihkarvuođanjuolggadusat. Dálá njuolggadusaid mielde galget čáhcebuođut čuovvut teknihkalaš gáibádusaid ja dain lea gáibádus sihke vákšumii, gearggusvuhtii ja siskkildasdárkkisteapmái.
Heivehit buođuid gierdat stuorát dulvviid
– Vaikko čáhcebuođu sihkarvuohta oppalaččat lea buorre, de soitet čáhcebuođut fertet gierdat stuorát dulvviid ja stuorát deattu boahttevaš dálkkádatrievdamiid geažil, lohká NVE čáhcebuođđosihkarvuođa hoavda Lars Grøttå.
Ođasmahtton raporta, NVE 17-2021, čájeha ahte lea 625 čáhcebuođu bajimus váikkuhanluohkás (2.3 ja 4) mat eai soaitte gierdat eambbo dulvvi nu go báiki, čáhcebuođđotiipa, dulveleahki dahje vuođđu.
– Ii leat nu váralaš ahte čáhcebuođđu lea hearki, muhto mearkkaša buođu ferte divvut nu ahte gierdá stuorát dulvviid, lohká Grøttå.
