-Almmuhus-
-Almmuhus-
OĐĐASAT Dálki ja uđasvárra hehtte ohcanakšuvnna

Dálki ja uđasvárra hehtte ohcanakšuvnna

-

-

Romssa politiijat dieđihit ahte sii leat leamaš báikkis ja oaidnán ahte sábetluottat mannet uđđasii, muhto eai vuhtto šat gostege. Politiijat jáhkket ahte dat njealjis, okta ruoŧŧelaš ja golbma suopmelačča, leat uđđasii váldon.

Politiijat leat pláneme ohcan-rusttegiiguin ohcagoahtit láhppon olbmuid.

– Mii leat gergosat girdiin ohcagoahtit go dálki ložže, lohká Romssa politiijaguovllu bargiidhoavda Morten Pettersen preassakonferánssas mii lei duorastaga.

Báikkis lea dálki ja maiddái stuorra uđasvárra, ja dan geažil eai sáhte girdiin ohcat eai ge sáhte sáddet ohcánveaga ge báikái.

 

Lea ain doaivva gávdnat 

Duorastaga čuovganeamis ohce giikaniin mainna oaidná seavdnjadin, muhto eai oaidnán olbmuid. 

– Lea hui gáibideaddji dilli sihke lagamuččaide ja buohkaide geat leat mielde akšuvnnas, lohká Romssa politiijaguovllu politiijameašttir Astrid Nilsen.

Gádjunákšuvnnas lea ain doaivva gávdnat olbmuid heakkas.


Dá oainnát kártta dan báikkis gos uđas lea fierran (Rukses stuora mearka) ja gos dat viđat olmmoš lei gii dieđihii (alit riekkis). Kártagovas oaidná maid gokko lávejit vánddardit go mannet Sarregáisái (sevdnjes alit sáhcu). Politiijat leat almmuhan dán kártta sin neahttasiidui.

 

 

 

 

 

-Almmuhus-