-Almmuhus-
-Almmuhus-
-Almmuhus-
OĐĐASATDálá boazodoalu «Elsa Laula Renberg» oaččui bálkkašumi

Dálá boazodoalu «Elsa Laula Renberg» oaččui bálkkašumi

-

-

Ábborášša boazodoalli, 27-jahkásaš Inga Biret Márjá Triumf, nammaduvvui Dán jagáš nuorra boazodoallin.
– Boazodoallu dárbbašii 1917:s nanu ja duostilis nissonolbmuid ja boazodoallu dárbbaša daid dál ain, cealká jury.

Dan dajai Norgga Boazosápmelaččaid Riikkasearvvi jođiheaddji, Ellinor Marita Jåma, go geigii bálkkašumi nuorra Guovdageainnu niidii, Inga Biret Márjá Triumfii.
– Lea rápmin buohtastahttojuvvot dákkár nággáris nissonolbmuin go Elsa Laula Renberg lei, lohká Inga Biret Márjá, ja mieđiha ahte son lea maid nággáris nieida.

 

– Buorre go nuoraid atnet árvvus
Inga Biret Márjá bargá beaivválaččat bohccuiguin, ja lohká bálkkašumi movttiidahttit ain viidáseappot bargat bohccuiguin.

– Lea maid hui buorre go čájehit ahte atnet nuoraid árvvus ja maiddái nissonolbmuid. Mus leat njeallje nuorat oappá geat maid leat hui rámis go mun lean ožžon dán bálkkašumi, mainna ovtta ládje čájehit ahte nissonolbmuide ja nuoraide lea sadji boazodoalus.

 

Sávvá movttiidahttit earáid
Dán jagáš nuorra boazodoalli sávvá bálkkašumi movttiidahttit eará báikkiid nuoraid, ja earenoamážit nieiddaid, maid duostat válljet boazodoalus bargat:

– Boazu ii beroš lea go nissonolmmoš vai dievdoolmmoš, beare máhttá bargat bohccuiguin, lohká Inga Biret Márjá Triumf.

 

Ođđa bálkkašupmi
Dán jagáš nuorra boazodoalli, lea ođđa bálkkašupmi man NBR, Eanandoallodepartemeanta ja Bohccobierggu márkanlávdegoddi geigejit.  

– Bálkkašumiin háliidit loktet ja gudnejahttit nuorra boazodolliid geat barget buori barggu loktet boazodoalu beaggima ja seammás leat mielde ovdánahttimis ceavzilis boazodoalu, celkkii eanandoallo- ja biebmoministtar Jon Georg Dale go geigii bálkkašumi ReinTråante doaluin Troandimis Sámi álbmotbeaivvi.

 

Ovdagovvan nuoraide
Jury, mas leat leamašan mielde eanandoallo- ja biebmoministtar, NBR jođiheaddji ja Bohccobierggu márkanastinlávdegotti jođiheaddji John Anders Lifjell, rámida dán jagi bálkkašumi vuoiti máŋgga oktavuođas leamašan oidnosis buori vuogi mielde ja leamašan ovdagovvan eará boazodoallonuoraide.

– Son lea ovdagovvan ja maid inspirašuvdnan eará nuoraide boazodoalus. Earret eará go lei mielde SVT TV-ráiddus «Renskötarna» ja čalmmustahttá iluid ja vuorjašumiid maid vásiha boazodoalus, dajai NBR jođiheaddji Ellinor Marita Jåma ovdal go čurvii vuoiti, Inga Biret Márjá Triumf lávdái vuostái váldit gudni ja vuoittuid.  Vuoitun oaččui iežas mearkka hábmejuvvon silba čeabetčikŋan ja 15 000 ruvnno.

 

Ášši joatká gova vuolde.


BURES GASKKUSTAN: Magne Haugom ja Eva Nordfjell Røros Rein fitnodagas rámiduvvoba dan barggu ovddas maid leaba dahkan gaskkustit bohccobierggu. Govve: Kari Lisbeth Hermansen

Buoremus bohccobiergogaskkusteaddji
Bálkkašupmi 2016 bohccobiergogaskkusteaddji geigejuvvui Røros Rein fitnodahkii.

– Dát bearašfitnodat lea vuollánkeahttá bargan ja lihkostuvvan ásahit máŋggaid doaimmaid maid vuođđun lea boazodoallu. Fitnodat fállá olulágán buktagiid ja leat ođđa vugiid mielde hutkan ođđa buktagiid, celkkii jurylahttu Ellinor Marita Jåma.

 

Ášši joatká gova vuolde.


GOAHKKA: Dan jagáš bohccobiergogoahkkan nammaduvvui Svein Jæger Hansen. Olggumusas olgešbealde lea Bohccobierggu márkanlávdegotti jođiheaddji,John Anders Lifjell, gii maid beasai fitnodagas, ARV – Arctic Rein og Vilt ovddas, viežžalit bálkkašumi. Govven: Kari Lisbeth Hermansen

Dán jagáš bohccobiergogoahkka
Goahkka Svein Jæger Hansen nammaduvvui dán jagáš bohccobiergogoahkkan.

– Dán jagáš bohccobiergogoahkka lea máŋggaid jagiid čehpet ja áŋgirit geavahan bohccobierggu biebmoráhkadeamis ja geavaha juohke vejolašvuođa čalmmustahttit bohccobierggu buriid beliid, cealká jury.

 

Dán jagáš bohccobiergobuvtta
ARV – Arctic Rein og Vilt faskii buoremus bohccobiergobuktaga bálkkašumi, buktagiin «Suovas».

 

-Almmuhus-