Børge Brende lea boahtte vahkku fitname stuora atomabázahusbáikkis mii lea dušše muhtin miilla eret Norgga rájis, namalassii Andrejevluovttas.
Børge Brende lea boahtte vahkku fitname stuora atomabázahusbáikkis mii lea dušše muhtin miilla eret Norgga rájis, namalassii Andrejevluovttas.
Norgga olgoriikaministtar Børge Brende mátki lea čalmmustahttin ahte dál álget sirdit boares radioaktiiva atomabázahusaid fatnasiin Murmánskii ja das viidáset Mayak báikái Lulli-Urálas Ruoššaš gos de várrogasat biđgejit bázahusaid, čállá The Independent Barents Observer.
Eai suova Norgga journalisttaid govvet
Ruošša eiseválddit leat addán dieđu Norgga journalisttaide ahte ožžot čuovvut ministara mátkki Ruoššas jus lea dušše peanna ja bábir fárus. Dan eai dohkket journalisttat ja dan dihte hilgot searvamis mátkái go Norgga olgoriikaministtar fitná Andrejevluovttas geassemánu 27. beaivvi. NTB journalista Jan-Morten Bjørnbakk lohká The Independent Barents Observerii ahte ii leat vejolaš čađahit barggu go leat restrikšuvnnat biddjon.
Juolludan ruđa čorgemii
Norga lea guhkit áigge juolludan ruđa vai radioaktiiva atomabázahusat leat áiddiid duohken ja ráddjejuvvon eret. Atomabázahusguovlu lea dat stuorimus bázahusguovlu árktalaš guovllus, ja dál álgá bargu rádjat bázahusaid.
