-Almmuhus-
OĐĐASATDál šattat dálkkodit beatnaga guorkkáid vuostá

Dál šattat dálkkodit beatnaga guorkkáid vuostá

-

-

Ođđajagemánu 1.beaivvi rájes šattat dálkkodit beatnaga jus leat Ruoŧas fitname mohki ja beana galgá leat fárus. Suomatuvrii ii dárbbat beana oažžut guorkádálkasa.

Njuolggadusat leat rievdan guorkádávdda ektui, jus leat fitname olgoriikkas. Vaikko lea oanehis tuvra Ruŧŧii, de lea bággu beatnaga dálkkodit guorkkáid vuostá, dieđiha Biebmobearráigeahčču.

– Fertet dárkilit árvvoštallat dárbbaša go beana čuvodit oanehis tuvrra go leat Ruoŧas fitname, dahje galgá go beana orodit ruovttus Norggas, muitala Biebmobearráigeahču seniorráđđeaddi Ole-Herman Tronerud.

 

Suomas ii leat guorká

Beana, mii galgá mielde olgoriikii, ferte ožžon dálkasa 24-120 diimmu ovdal go boahtá fas Norgii. Lea šibitdoavttir gii galgá dikšut beatnaga dálkasiin ja duođaštit beatnaga pássas ahte lea ožžon dan dálkasa.

Jus mátkkoštat njuolga riikkaide gos guorká ii gávdno, de it dárbbat addit dan dálkasa. Riikkat gos ii leat guorká, lea Suopma, Irlánda, Stuora-Brittánia ja Malta.

 

Dehálaš ahte guorká ii boađe Norgii

Guorká lea máhtu mii lea parasihtta (Echinococcus multilocularis). Dat ii leat várálaš beatnagiidda ja riebaniidda, muhto jus olbmui njoammu dat, de sáhttá olmmoš jápmit. Parasihtta ii gávdno Norggas, ja lea dehálaš ahte dat ii boađe Norgii. Dat lea sivvan daidda garra njuolggadusaide, ja sivvan manne beanaeaiggádat fertejit čuovvut njuolggadusaid.

Jus dávjá finat Ruoŧas beatnagiin, de sáhtát dávjá dikšut beatnaga guorkkáid vuostá. Ii galgga gollat eambbo go 28 beaivvi juohke dikšuma gaskkas. Šibitdoavttir šaddá duođaštit ahte beana lea ožžon divššu.

-Almmuhus-