Guovdageainnu suohkan ávžžuha dál nuoraid ohcat valáštallanstipeandda.
– Mii ávžžuhit min nuorra valáštalliid ohcat valáštallanstipeandda, čállá Guovdageainnu suohkan. Guovdageainnu suohkan juohká jahkásaččat valáštallanstipeandda valáštallantaleanttaide. 2022:s lea stipeanda sturrodat 10 000 ruvnno ja juhkko dušše ovtta valáštallái juohke jagi.
Movttiidahttet nuoraid
Stipeandda ulbmil lea movttiidahttit nuoraid joatkit iežaset valáštallansurggiin.
Stipeandda eavttut:
Valáštallanstipeandda sáhttet dušše sii ohcat guđet ovddastit searvvi dahje klubba Guovdageainnu suohkanis.
Spiehkasteami sáhttá dahkat go valáštalli ferte dieđihit sirdima eará klubbii, nu ahte sáhttá joatkit iežas valáštallansurggiin.
Valáštalli ferte bohtosiiguin duođaštan attáldagaid ja ovdánanvejolašvuođaid, ja sus galgá leat áigumuš olahit nationálalaččat buoremus dássái.
Valáštalli galgá čuovvut dihto plánejuvvon hárjehallama.
Valáštalli lea geatnegahtton ovdánahttit iežas valáštallama unnimusat dan jagi, go lea ožžon stipeandda, ja vel maŋit jagi.
Joavkovaláštallit sáhttet ohcat seamma ládje go oktagaslaš valáštalli.
Seamma valáštalli sáhttá stipeandda oažžut dušše oktii.
Vuolit ahkemearri biddjo dan jahkái go valáštalli deavdá 16 jagi.
Gáldu: Guovdageaidnu suohkan
