Priváhta eaiggádat, geain lea ráfáidahttojuvvon sámi visti, sáhttet dál ohcat doarjaga Sámedikkis divodit visttiid.
– Lea erenoamáš somá oaidnit movt boares ja billahuvvan vistti, doarjagiin ja nana duodjemáhtuin, sáhttá divodit ja atnigoahtit fas, leaš dal sáhka ođđasit atnimis dahje visttiin maidda álggahuvvo ođđa doaibma, dadjá sámediggeráđđi Hans Ole Eira (Gb) preassadieđáhusas.
Doarjja namma lea «Doarjja – sámi kulturmuittut ja kulturbirrasat», ja lea erenoamážit ráfáidahtton sámi visttiid priváhta eaiggádiidda. Áigemearri ohcat doarjaga jahkái 2023 lea skábmamánu 1. beaivvi 2022, čállá Sámediggi.
