Dál sáhtát iskat vearrodieđáhusa

Vearrodieđáhus lea ovdagihtii devdojuvvon, muhto ii leat gárvásit devdojuvvon. Vearroetáhta oažžu dieđuid olu sajiin, muhto leat ain oasit maid olmmoš ieš ferte dieđihit vai vearru šaddá riekta.  Dan dieđiha Vearroetáhta preassadieđáhusas.

– Muhtun dieđuid ferte ieš deavdit, ja dábáleamos oasit leat dienas mii boahtá opmodagas ja olgoriikka dilálašvuođain. Mii oažžut eambbo ja eambbo dieđuid finánsaárvvuid birra mat leat olgoriikkas, muhto dat dávjá eai leat devdon vearrodieđáhusas. Mis eai ge leat doarvái dieđut láigodietnasis ahte sáhttit ovdagihtii daid deavdit, lohká vearrodirektevra Hans Christian Holte. 

– Iežas ovddasvástádus

Leat maid olu gessosat maid sáhttá manahit jus ii deavdde rievttes dieđuid, earret eará mátkkoštangolut.

– Jus buot dieđut leat mielde vearrodieđáhusas, ja leat riekta, dalle it dárbbaš dan deavdit. Muitte ahte lea iežat ovddasvástádus ahte dieđut leat ollislaččat ja riekta, lohká Holte.

Álkit vearrodieđáhus

Šaddá álkibun jagis jahkái iskat ja deavdit vearrodieđáhusa. Measta buohkat isket, rievdadit ja buktet vearrodieđáhusa elektrovnnalaččat. Dán jagi sádde Vearrodieđáhus 875 000 báber-vearrodieđáhusa, diibmá sáddii 925 000.

– Mii oaidnit ahte eatnasat válljejit digitála čovdosa, ja ožžot buot dieđuid elektrovnnalaččat. Lea álki, jođán ja sihkar, lohká Holte.

Buktináigemearri

Vearrodieđáhusa galget priváhtaolbmot buktán ovdal cuoŋománu 30. beaivvi. Ealáhusdoaimmaheaddjit galget buktán ovdal miessemánu 31. beaivvi.

Dienasbargit ja pensionisttat, geain ii leat mihkke rievdademiid, eai dárbbaš buktit dan. Ealáhusdoaimmaheaddjit gal fertejit buktit dan elektrovnnalaččat Altinn bokte. 

Veahkehit

Vearroetáhta neahttasiidduin gávdná mátkkoštanbagadallama ja geasuskalkuláhtora. Dat sáhttet veahkkeneavvun deavdimis.

Vearrodieđáhus sáddejuvvo máŋgga gillii. 

4,2 miljovnna leat girjedárogillii, 475 000 leat ođđadárogillii. 200 leat sámegillii ja 225 000 leat eaŋgalasgillii.