-Almmuhus-
OĐĐASATDál sáhkkohalat jus it bija biilaboahkána

Dál sáhkkohalat jus it bija biilaboahkána

-

-

Stáda geaidnodoaimmahat álgá dan vahkku iskagoahtit geavahit go busses biilaboahkániid. Dál ii oaččo šat dušše várrehusa, muhto sáhku jus ii leat boagán.

 – Dan vahkku mii iskagoahtit bussiid Davvi-Norggas. Min váldoulbmil lea diehtojuohkin ja fuomášuhttit olbmuid man dehálaš lea geavahit biilaboahkána busses maid, lohká Stáda geaidnodoaimmahaga kampánjavásttolaš Ann Synnøve Elvevoll preassadieđáhusas.

Stáda geaidnodoaimmahat lea dálvet iskan boagángeavaheami Davvi-Norggas. 1600 olbmos váillui 332 olbmos boagán. 20 mánás ii lean boagán. Ovtta busses ii lean vuoddjis boagán. Stáda geaidnodoaimmahat jáhkká ahte leat olu stuorát logut go maid sii nagodit iskat.

 

– Ii dušše iežat, muhto earáid maid

 – Jus dus ii leat boagán ja lihkohisvuohta geavvá, de sáhtát sorbmet sihke iežat, muhto maid earáid. Midjiide ii leat dat sáhkku nu dehálaš, muhto dat lea veahkkeneavvun olbmuid oažžut boahkána geavahit, lohká Elvevoll.

Son lohká ahte jus geavvá lihkohisvuohta, de sáhttet busses oba olu olbmot roasmmohuvvat.

 – Jus boahkána atná, de dat doallá olbmo iežas sajis, ja nu sáhttá gádjut heakka, lohká son.

 

Eai buot bussiin boahkánat

Gávdnojit máŋggalágan busset, muhto ii buot bussiin leat geatnegahttojuvvon ahte galgá boagán. Muhtin bussiin leat čuožžunsajit, ja leat oaivvilduvvon ahte ii galgga nu leahtus vuodjit, ja dávjá luoitit olbmuid sisa ja olggos. Dat mat dan vahkku iskojuvvojit leat dakkár busset mat leat meinejuvvon guhkit gaskkaid vuodjit, ja leahtuin.

 – Vaikko buot bussiin eai leat boahkánat, de lea hui dehálaš geavahit boahkána dalle go dat lea vejolaš. Buot vearrámus busselihkohisvuođat, mat leat leamaš Norggas, leat dalle go olbmot eai leat atnán boahkána busses mas leat boahkánat, loahpaha Elvevoll.

-Almmuhus-