-Almmuhus-
-Almmuhus-
-Almmuhus-
OĐĐASAT– Dál mii iskagoahtit boazodoallonissoniid dearvvašvuođa

– Dál mii iskagoahtit boazodoallonissoniid dearvvašvuođa

-

-

UiT Norgga árktalaš universitehta Sámi dearvvašvuođadutkama guovddáš áigu dál iskat boazodoallonissoniid eallindili ja dearvvašvuođa ođđa prošeavttas.  

Lea ásahuvvon sámi dutkiid prošeaktajoavku mii galgá dál iskat boazodoallonissoniid dearvvašvuođa ja eallindili. 

– Leat dál sámi dutkit geat ieža leat boazodoalus geat áigot bargat prošeavttain, čilge Inger Dagsvold, gii lea UiT Norgga árktalaš universitehta Sámi dearvvašvuođadutkama guovddáža prošeaktajođiheaddji. Sis lea ulbmil gávdnat eanet dieđuid boazodoallonissoniid eallindili birra.

PROŠEAKTAJOAVKU GEAT DUTKET SÁMI NISSONIID: Gurut bealde dutki Marja Skum,  prošeaktamielbargi/dutki,Inger Dagsvold, phD, dutki ja Siv Merete Selnes Sara, prošeaktamielbargi. Govva: Astrid Helander
PROŠEAKTAJOAVKU GEAT DUTKET SÁMI NISSONIID: Gurut bealde dutki Marja Skum,  prošeaktamielbargi/dutki,Inger Dagsvold, phD, dutki ja Siv Merete Selnes Sara, prošeaktamielbargi. Govva: Astrid Helander

Nissoniid dearvvašvuohta

Gávdno unnán dutkan dearvvašvuođa ja eallindilis boazodoallonissoniid birra. Muhtin dutkamat čájehit ahte nissoniin lea olu bargu ja hástalusat mat sáhttet váikkuhit sin dearvvašvuođa, muitala Dagsvold. 

–  Ulbmil lea gávdnat movt boazodoallonissonat vásihit dearvvašvuođaváttuid, muhto maiddái mii lea buorre sin eallindilis. Mii dárbbašit eanet dieđuid vai sáhttit eastadit dearvvašvuođaváttuid boazodoallonissoniid várás, dadjá Dagsvold. 

Dutket sámegilli 

Dagsvold čilge ahte leat ásaheamen ođđa dutkama, mii lea earenomáš go ii leat goassege dahkkon dakkár dearvvašvuođadutkan sámegillii ja sámi dutkiin. 

– Mun in ieš sámás nu bures ja danin leat virgadan sámigielat dutkiid ja prošeaktabargiid geat galget gažadit boazodoallonissoniid davvisámegillii. Mis leat maid dan proševttas guokte nissonráđđeaddi geat ieža gullaba boazdollui, muitala Inger.

Lea deaŧalaš ahte nissonat besset sámástit go gažaduvvojit prošeavttas, muitala prošeaktajođiheaddji. 

– Leat prošeaktajoavkkus ságastan makkár fáttáid galgat loktet. Prošeavttas sáhttit maiddái čalmmustahttit sámiegiel dearvvašvuođasániid ja -doahpagiid. Dat sáhttet leat ávkin dearvvašvuođabargiide geat deaivvadit sámegielat pasieanttaiguin, muitala Inger. 

Gažadit nissoniid

Prošeaktabargit Marja Skum ja Siv Selnes Sara galgaba dál gažadit boazodoallonissoniid geat leat badjel 18 Davvi-Sámi guovllus. Dutkan čađahuvvo dušše Norgga bealde go lea Norgga Dearvvašvuođadepartemeanta mii juolluda prošeaktaruđaid. 

– Lea prošeakta mii galgá bistit olles jagi ja prošeavtta boađus galgá vuođđun gažadanskovvái mas dutkat dearvvašvuođa, ja maid eallinláhkedutkamii SAMINOR 3, mii lea jođus dal. Dat galgá sáddejuvvot 80 000 olbmui miehtá Romssa, Finnmárkku, Nordlándda ja Trøndelága  gos orrot olu sápmelaččat, čilge UiT Norgga árktalaš universitehta prošeaktajođiheaddji, Inger Dagsvold.

Dutkan galgá maiddái čájehit mii lea positiiva ja mii suddje nissoniid dearvvašvuođa váttuid vuostá.

– Jus muhtimis lea miella searvat min prošektii, de sáhttá váldit oktavuođa min prošeaktabargiin. Buot jearahallamat anonymiserejuvvojit, loahpaha prošeaktajođiheaddji Inger Dagsvold. 

Loga maid:
–Sámi nisso­niin lea heajut stáhtus boazo­doalus 

-Almmuhus-