-Almmuhus-
OĐĐASAT– Dál lea sajis ja lea hirbmat buorre dovdu! 

– Dál lea sajis ja lea hirbmat buorre dovdu! 

-

-

Illusáhka Tråanteguovllu sápmelaččaide: Sámedikki ja Tråanten tjïelte ovttasbargošiehtadus lea viimmat vuolláičállojuvvon.

Šiehtadus galgá buktit sámi ássiide olu ovdamuniid, ja váldoáŋgiruššan lea dieđusge čalmmustahttit sámevuođa gielddas. 

– Galgá bearráigeahččat ahte sápmelaččaide báikkis leat fálaldagat, ja dieđusge ahte olles álbmot doppe ferte eambbo gelbbolašvuođa ja dieđu  oažžut sámi áššiin ja sámi servodatdilálašvuođas. Leat máŋga beali, muhto vuosttažettiin lea dieđusge ahte sápmelaččat doppe galget oažžut fálaldagaid, lohká sámedigge presideanta Silje Karine Muotka. 

Ovttasbargu lea leamaš guhkit áigge proseassa ja proševtta vuolggasadji álggii 100 jagi ávvudeamis mii Tråanttes lágiduvvui 2017:s, muhto vuolláičállimis leat leamaš hehttehusat.

– Lea olu mii lea dáhpáhuvvan áigodagas mii lea hehtten proseassa, nu go korona ja eará mii lea dahkan váttisin formálalaččat vuolláičállit šiehtadusa. Muhto lea hui buorre go mis lea dál dat soahpamuš sajis, lohká Muotka. 

Hástalusat Tråanttes

Váldohástalus Tråanttes, nu mo eará sajiin Sámis maid, lea go váilot oahpaheaddjit, ja dan lohká Muotka eanemus hástaleaddji čuokkisin. 

– Váilu gelbbolašvuohta mii sáhttá sihkkarastit sihke skuvladili ja ahte mis lea sámegiella juohke sajis gos lea dárbu, ja máttasámegiella han lea rašes dilis, lohká sámediggepresideanta Silje Karine Muotka. 

– De lea dieđusge gažaldat movt sihkkarastit ahte mis leat doarvái ohccit oahpaheaddjeoahpuide, ahte olbmot válljejit bargat oahpaheaddjin. Muhto die lea maid juoga maid leat vuoruhan julggaštusas, ja mii leat bargan fárrolaga eará eiseválddiiguin, nu mo movt stáhta sihkkarastá ahte mis lea buoret doaibma bohčit dien stuora servodatbarggus, mii lea rievtti mielde juohke sajis, muitala Muotka.

Sámi deaivvadanbáiki

Tråantte sápmelaččat galget maiddái oažžut iežaset sámi deaivvadanvistti, muhto prošeakta lea maŋiduvvon das go báikkis gosa galgá visti maid galget ođastit, leat gávdnan dildaláirri.

– Sámi deaivvadanbáikkiid prošeakta lea veahá maŋiduvvon go Tråanttes leat gávdnan dildaláirri, nu ahte dat lea veahá hástalan ođasmahttinprošeavtta, muhto mis lea doaivva fargga rahpat dakkár deaivvadanbáikki Tråanttes.

Dán prošektii lea Troanddima gielda juolludan 15 miljovnna ruvnno ásahan dihte viesu mas sámevuohta lea guovddážis, ja huksen álgá maŋŋel geasi.

Loga maid:
Sámevuohta eambbo oidnosis Tråanttes

Olu eará sámi áŋgiruššamat

Presideanta namuha ovtta stuora ja buori dáhpáhusa, namalassii mánáidgárdefálaldagaid, mat leat dál sajáiduvvan, ja mánnáloguin oidnet ge man dárbu dakkár áŋgiruššamiin lea.

– Doppe leat juo olu mánát, ja dat mii lea hirbmat buorre lea go doppe leat jo guhttanuppelohkái máná geat galget álgit dainna, lohká Muotka ja namuha ahte dakkár ovttasbargošiehtadusain sáhttá bearráigeahččat ja sihkkarastit dakkár dehálaš osiid.

Eará sámi áŋgiruššamiid maid Muotka namuha lea earret eará sámi designer árena «Šoop Šoop», maid easkkabáliid lágidedje. Muđui lágiduvvo maiddái Lulli-Sámi kulturfestivála, mii álgá odne, cuoŋománu 29. beaivvi, Tråanttes. 

– «AMMA Tråante» leat kulturdoalut maid oktavuođas galgá earret eará sámi biebmu čalmmustahttojuvvot. Dat leage Beaiveálgojulggaštusa váldoáŋgiruššansuorgi, ja dat mielddisbuktá ahte min biebmobuvttadeaddjit ožžot stuorát márkana ja buoret vejolašvuođaid, lohká Muotka.

– Dál lea čállojuvvon šiehtadus, movt dat orru?

– Dál lea dat sajis ja lea hirbmat buorre dovdu! lohká sámediggepresideanta mojonjálmmiid.

Historjjálaš beaivi 

Troanddima sátnejođiheaddji Rita Ottervik lea maiddái, nu mo Muotka, earenoamáš duhtavaš ovttasbargošiehtadusain, ja son muitala ahte gielda dárbbaša veahki Sámedikkis. 

– Lei historjjálaš beaivi ikte go vuolláičáliimet, dan dihte go dat bidjá rámmaid strukturerejuvvon ovttasbargui maid sihke gielda ja Sámediggi leat geatnegahttojuvvon čuovvut. 

OVTTASBARGGUT: Dál besset Sámediggi ja Troanddima gielda álggahit ođđa prošeavttaiguin bargat. Govas Troanddima gieldda sátnejođiheaddji Rita Ottervik ja sámediggepresideanta Silje Karine Muotka. Govva: Wenche J.M. Andersen, Sámediggi.
OVTTASBARGGUT: Dál besset Sámediggi ja Troanddima gielda álggahit ođđa prošeavttaiguin bargat. Govas Troanddima gieldda sátnejođiheaddji Rita Ottervik ja sámediggepresideanta Silje Karine Muotka. Govva: Wenche J.M. Andersen, Sámediggi.

Hástalusat, maid Muotka maid namuhii badjelis čállosis, gávdnat sámegielat gelbbolašvuođa skuvllaide ja mánáidgárddiide, lohká Ottervik eai nagodit čoavdit ieža, Sámedikki haga.

– Sis leat sihke čovdosat ja doarjagat. Jáhkán šaddá hui, hui buorre dát. 

Ottervik namuha muđui Sámi deaivvadanbáikehuksema ja maiddái «Elsa Laula Renbergsplass», man áigot ođasmahttit. Juste dál lea doppe gaskaboddosaš čájáhus mas čužžot dieđut.

– Mii háliidit eambbo dakkár «gávpotlanja», gos sáhttet sihke doalut ja maiddái báiki man olbmot mannet geahččat.

-Almmuhus-