Juste dán vahku galget sámegielat gullot ja oidnot juohke sajis.
Sámi giellavahku ulbmilin lea buoridit sámegielaid stáhtusa, ja buoridit máhtu sámi giela ja kultuvrra birra olles servodagas. Dán vahku, golggotmánu 21.- 27. beaivvi lágiduvvo giellavahkku miehtá riikka.
— Sámi giellavahkus mii ovttas oainnusmahttit ja buoridit máhtu sámegielaid birra olles servodagas. Priváhta ja almmolaš ásahusat, ealáhuseallin, organisašuvnnat ja eará aktevrrat bovdejuvvojit oainnusmahttit sámegielaid juste dán vahkus. Ovttas váldit mii stuorábuš ovddasvástádusa sámegielaid gullomis, oidnomis ja geavaheames buot servodatsurggiin, čállá giellavahkku. Sámi giellavahkku lea oassi Sámedikki guhkes áiggi giellaáŋgiruššamis «Giellalokten», ja dát lea maiddái Sámedikki ON álgoálbmogiid riikkaidgaskasaš giellajagi váldočalmmusteapmi.
Manne lea Sámi giellavahkku deaŧalaš?
— Vaikko leat áitojuvvon jávkamis, de sámegielat ain bissot. Doaivva lea. Sámiid gaskkas lea dihtomielalašvuohta giela ja giellaválljema ektui, ja eanet ja eanet olbmot válljejit searvat kurssaide oažžun dihtii giela ruovttoluotta maid min máttut masse. Guovlluin, gos sámegiella ii leat geavahuvvon sohkabuolvva dahje guovtti áiggi, de váldet dál nuorra rávesolbmot sámegiela ruovttoluotta ja geahččalit várrugasat addit dan viidáseappot mánáidasaset. Ođđa sámegielat sohkabuolva sámegielat mánáiguin bajásšaddá dál. Norgga servodat lea maiddái fátmmastan sámi kultuvrra, ja sámit miehtá riikka vásihit ahte sin kultuvra ja gielat eanet dohkkehuvvojit. Beroštupmi sámi servodahkii lea stuoris, ja áigi goas dahkat oktasaččat giellaáŋgiruššama, ii sáhtáše leat buoret.
