Gaskavahku ođđajagimánu 13. beaivvi geahččala Norgga siviilasuodjalus iežaset jietna-tyfonaid.
Siviilasuodjalusa diehtu «Dehálaš diehtu – oza dieđuid» geahččaluvvo gaskavahku buot suohkaniin gos jietnarusttegat leat anus.
Jahkásaččat ođđajagimánus ja geassemánus lea áigi geahččalit rusttegiid, ja jietna sáddejuvvo golmma geardde, minuhta gaska juohke jiena gaskkas.
Jietna mearkkaša ahte lea dehálaš diehtu ja ahte olbmot galget ohcat eambbo dieđuid, ovdamearkka dihte rádios, tv:s, aviissain, eiseválddiid neahttasiidduin dahje sosiála mediain.
1250
Miehtá Norgga leat oktiibuot 1250 jietnarusttega anus ja dat galget dieđihit álbmogii jus lea fáhkka várra. Dieđihanrusttet sáhttá geavahuvvot sihke ráfiáiggi, muhto maid soađis.
– Ráfiáiggi sáhttet jietnarusttegat adnot ovdamearkka dihte jus várálaš gássat dahje ávdnasat suđđet dahje golget. Soađis fas geavahuvvojit ovdamearkka dihte jus girdit fallehit, dadjá Siviilasuodjalusa doaibmi hoavda, Sigurd Heier preassadieđáhusas.