Odne oktiičaskojuvvojit Oarje-Finnmárkku ja Nuorta-Finnmárkku politiijaid operašuvdnaguovddážat. Otná rájes lea Finnmárkku áidna operašuvdnaguovddáš Girkonjárggas.
Finnmárkku politiijat oktiičasket odne fylkka guokte operašuvdnaguovddáža ovtta guovddážii. Dat lea Girkonjárggas. Operašuvdnaguovddáš mii lea Hammerfeasttas, heaittihuvvo.
— Lea stuora beaivi midjiide. Operašuvdnaguovddáš lea vuođđun min operašuvnnalaš bálvalussii. Dát lea dehálaš beaivi oktasaš politiijabálvalussii Finnmárkkus. Lea historjjálaš ja suddu go Hammerfeastta guovddaš heaittihuvvo, lea guhka ja nannosit bálvalan. Sis lea buorre hárjáneapmi ja olu máhttu maid váldit mielde oktasaš operašuvdnaguovddážii, lohká Finnmárkku politiijameašttir Ellen Katrine Hætta preassadieđáhusas.
Sihke Hammerfeasttas ja Girkonjárggas leat doalut odne, maid buot Finnmárkku politiijakantuvrrat čuvvot.
