Moadde beaivvi lea vel vejolaš rievdadit vearrodieđáhusa, ovdal go áigemearri dievvá.
Mánnodaga lea áigemearri sáddet vearrodieđáhusa. Lea juohke ovtta iežas ovddasvástádus ahte dieđut leat riekta.
Vihtta beaivvi ovdal go áigemearri dievvá, de leat 3 miljovnna dienasolbmo ja pensionistta rahpan iežaset vearrodieđáhusa. Dat lea 86 proseantta sis geat ožžot vearrodieđáhusa digitála hámis, dieđiha Vearroetáhta preassadieđáhusas.
– Buorre go nu olusat leat rahpan dieđáhusa, sávvat ahte leat iskan maid buot dieđuid. Lea go buot riekta? Lea go mihkke maid ieš ferte deavdit, nu go láigodienas dahje olgoriikadienas? Ferte maid iskat lea go ožžon buot gessosiid maidda lea riekti, lohká Jannicke Valbrek Vearroetáhtas.
Veahkehit
Dienasbargit dahje pensionisttat geat leat iskan dieđáhusa, eai ge dárbbaš rievdadit maide, eai dárbbaš sáddet dieđáhusa, dat sáddejuvvo ieš.
Vearrodieđáhusa deavdimii sáhttá oažžut veahki máŋgga sajis, váldokanála lea Vearroetáhta neahttasiidduin.
– Gávnnat vástádusa eanas áššiide neahttasiiddus, muhto jus dárbbašat eambbo veahki, de leat máŋgačuođi bagadalli mis gergosat vástidit gažaldagaid telefovnna, chat ja Facebook bokte. Jus lea mihkke masa it leat sihkar, de sáhtát váldit minguin oktavuođa.
– Diehtit maid ahte lea measta miljonbeale olbmo geat eai leat vel rahpan ge vearrodieđáhusastis. Jus leat okta sis, de berret dál vel iskat, lohká Valbrek.
Muhtun oassi sádden olu ovdal
86 proseantta sis geat ožžot vearrodieđáhusa digitála hámis, sullii 3,5 miljovnna olbmo, leat rahpan dan.
Dasa lassin leat birrasii 875 000 olbmo geat ožžot vearrodieđáhusa báberhámis.
475 000 vearrodieđáhusa ledje juo sádden sisa vahkku ovdal áigemeari. Dat lea eambbo go seamma áiggi diibmá.
