Juohke jagi šaddet buollinčáskadeaddjit jáddadit badjelaš duháha viessobiipobuollima Norggas, ja áigodat lahkona fas dál.
Servvodatsihkarvuođa- ja gearggusvuođadirektoráhta statistihkas boahtá ovdan ahte 12 proseantta buollimiin diibmá lei biipobuollin.
– Dál álgá dat áigodat go biipput buolligohtet. Ollu buollimiid livčče sáhttán hehttet jus dolastivčče rievttes ládje, lohká If dáhkádusfitnodaga diehtojuohkinhoavda Sigmund Clemenz preassadieđáhusas.
Go buolašta, de stuorru buollinvárra, go eambbogat álget dolastit.
Njuoska muorat ja unnán áibmu dagahit ahte suovva šaddá bihkkan, nu gohčoduvvon rávrrabihkkan ja giehpan, mii fas darvána biippu siskobeallái. Ommana dolla fas bulleha rávrrabihka biippu siskkobealde.
Clemenz ávžžuha boaldit goikemuoraid, bures bullehit muoraid ja bidjat olu jiela ommanii, čállá If.