Skábmamánu 1. beaivi ohcanáigemearri Kulturmuitofondii lea dál historjá, dál rievdá ruhtadoarjjaortnet jotkkolaš ohcanáigemearrin. Dat mearkkaša ahte sáhtát vaikko goas ohcat doarjaga iežat kulturmuitui, ja ahte vástádus ohcamii boahtá jođáneappot go ovdal.
Kulturmuitofoanda ásaha dál jotkkolaš ohcanáigemeari buot iežaset doarjjaortnegiin gáhtten dihte kulturmuittuid.
Ovdal lea skábmamánu 1. beaivi leamaš jahkásaš ohcanáigemearri doarjagii gáhttet gáhttenárvosaš kulturmuittuid. Álkidan dihte proseassa geavaheddjiide, de meannudišgoahtá Kulturmuitofoanda ohcamiid dávjjit. Dat mearkkaša ahte sáhtát dál juo sáddet iežas ohcama.
– Duogáš dasa lea go ohccit galget jođáneappot oažžut vástádusa iežaset ohcamii, dadjá direktevra Simen Bjørgen preassadieđáhusas, ja lasiha ahte dát geahpida barggu sihke ohcciide ja maiddái Kulturmuitofondii.
Stádabušeahta evttohusas árvala ráđđehus nannet Kulturmuitofoandda, vai galggašii juhkkot 116 miljovnna ruvnno doaimmaide miehtá riikka.
Gii sáhttá ohcat maid?
Kulturmuitofoanda lea stáda ruhtadoarjjaortnet, ja lea gáhttenárvosaš kulturmuittuid priváhta eaiggádiid váste. Eaktodáhtolaš organisašuvnnat ja vuođđudusat sáhttet maid ohcat doarjaga.
Ulbmil Kulturmuitofoanddain lea nannet barggu gáhttet gáhttenárvosaš kulturmuittuid ja váikkuhit valljivuođa kulturmuittuin ja kulturbirrasiin mat sáhttet geavahuvvot boahtteáiggi vásáhusaid, máhtu, ovdáneami ja árvolassáneami ektui.
