Ruoŧa sámediggeválggaid gaskaboddosaš bohtosat čájehit ahte Guovssonásti bellodat, mii maŋemus áigodagas lea opposišuvnnas leamaš, lea okta válggaid stuorimus vuitiin, go sii ožžot guokte saji eanet Sámedikkis, ja bellodagas leat dal vihtta saji.
Ruoŧa sámediggeválggaid gaskaboddosaš bohtosat čájehit ahte Guovssonásti bellodat, mii maŋemus áigodagas lea opposišuvnnas leamaš, lea okta válggaid stuorimus vuitiin, go sii ožžot guokte saji eanet Sámedikkis, ja bellodagas leat dal vihtta saji.
Miessemánu 21. beaivvi ledje Ruoŧa Sámedikki válggat ja dán vahkku lohkagohte Norrbottena leanastivra jienaid. Válggaid loahppabohtosat leat válbmasat duorastaga, ja leanastivrra gaskaboddosaš logut čájehit ahte Bivdo- ja guolástansámit lea stuorimus bellodat ovcciin áirasiin. Maŋemus áigodagas leage Bivdo- ja guolástansámiin ovttas ovttasbargoguimmiiguin leamaš Sámedikki jođiheapmi.
Stuorimus joavku
Guovssonásti bellodat, mii maŋemus áigodagas lea opposišuvnnas leamaš, oažžu guokte eanet saji Sámedikkis, ja bellodagas leat dal vihtta saji. Nubbi Guovssonástti guovtti bellodatjođiheaddjis, Lars-Miguel Utsi, lohká bohtosiid čájehit ahte sii ovttasbargoguimmiiguin leat dat stuorámus joavku Sámedikkis 15 áirasiin.
– Fápmu gal oba sihkkarit rievdá Sámedikkis dál, ja mis lea buorre vejolašvuohta oažžut jođiheami. Min joavku leat dat stuorámus joavku dál, ja mii dárbbašit 16 áirasa oažžut eanetlogu ja stivrejumi Sámedikkis. Leat njeallje bellodaga mat leat ožžon ovtta áirasa, ja mii fertet dál gávdnat geainna dain sáhttit ovttasbargat, lohká son.
Sii galget ge dál borgemánu rádjái bargat dan ala ahte hukset eanetlogu.
– Mis lea oktasaš ovddasvástádus hukset nanu Sámedikki mii addá bargoráfi boahttevaš njealji jahkái, lohká Utsi.
Utsi mielas lea Guovssonástti ovdáneapmi dáin válggain hui illudahtti.
– Lean hui duhtavaš ja giitevaš go olbmot jienastit min ja politihka mii nanne olles Sámi servvodaga ovdáneami, ealáhusaid ja boazoealáhusa. Go geahččá ollislaš jienastanlogu de leat Sámedikki jienasteaddjit lassánan viđain proseanttain, ja dat lea hui positiiva midjiide, lohká Utsi.
