Gáivuona Risttalaš álbmotbellodaga njunuš Einar Eriksen lohká fertet doarjut ođđa fitnodagaid sin suohkanis, vai olbmot bissot doppe.
Gáivuona Risttalaš álbmotbellodaga njunuš Einar Eriksen lohká fertet doarjut ođđa fitnodagaid sin suohkanis, vai olbmot bissot doppe.
Ávvir lea jearran golbma gažaldaga buot listo- ja bellodatnjunnošiin, ja dá leat Gáivuona Risttalaš álbmotbellodaga njunnoša Einar Eriksena vástádusat.
1. Makkár ášši anát don deháleamos válgaáššin din suohkanis?
– Gáivuonas leat dál buorit skuvla- ja dearvvašvuođafálaldagat, muhto min suohkanis fárrejit olbmot eret nugo eará smávva suohkanaččain juo dahket. Okta dain deháleamos áššiin lea oažžut álbmotlassáneami ja eambbo ealáhusvuođđudemiid. Go láhčit dasa buoret dili, de álgá mannat buori guvlui ja šaddá ávkin olles Gáivuona servodahkii. Ferte bidjat návccaid ovddidit viessohuksemiid, buoridit infrastruktuvrra, ealáhusvisttiid ja ovdáneami.
2. Mii du oaidnu lea dan áššis?
– Dearvvašvuohta, bearaš ja sosiálapolitihkka lea dehálaš vai váldit vára ovttaskas olbmos. Min mielas lea diehttalas ášši ahte buohkain leat seamma vejolašvuođat, vaikko makkár iešvuođat ležžet. Galgá leat buorre bajásšaddat Gáivuonas, ii ge galgga okta ballat boarásnuvvanbeivviin.
3. Mat leat du váibmoáššit?
Váibmoáššit leat dearvvašvuođa, bearaš ja sosiálapolitihka áššit, ja olmmošlogu ja ealáhusaid ovdáneami.
Son lasiha ahte ássama ja ealáhusaid ovdáneapmi lea dehálaš bisuhit ealli giliid Gáivuonas.
– Mii áigut čađahit ealáhuspolitihka mii addá eambbo bargosajiid ja innovašuvnna ja ođđa ásahemiid. Lea hui dehálaš láhčit dili unna ja vehá stuorebuš fitnodagaide, oaivvilda Eriksen
