Eatnasat lulde leat juo biikadeahkaid váldán eret biillain, muhto davvin leat ain dássážii beassan doaladit daiguin. Dál ferte molsut.
Eatnasat lulde leat juo biikadeahkaid váldán eret biillain, muhto davvin leat ain dássážii beassan doaladit daiguin. Dál ferte molsut.
– Sáhttet ain idjabuollašat, erenoamážit badjelis. Lea goit ge biilavuoddji ovddasvástádus siivvu árvvoštalat, ja diehtit ahte miessemánus ain sáhttá dálvesiivu olu sajiin riikkas, earenoamážit davvin, lohká Jeanett Tennefoss Tryg Forsikring dáhkádusfitnodagas.
Sierra áigemearri davvin
Davvi-Norggas lea sierra áigemearri goas galgá molsut dálvejuvllaid, miessemánu 1. beaivvi. Meteorologat leat dieđihan bivvaliid dán vahkku, ja danne jáhkket sáhttit dál juo molsut juvllaid.
Miehtá riikka sáhttet goit ge vuodjit biikadeahkaiguin jus orru dárbu. Sihkarvuohta lea deháleabbo go áigemearri, dieđiha Tryg Forsikring preassadieđáhusas.
Jus leat biikadeahkat biillas dalle go ii leat dárbu, de gal sáhttá oažžut 500 ruvdnosaš sáhku.
– Heaggavárálaš
Biikakeahtes dálvejuvllaiguin sáhttá vuodjit birra jagi, ja olusat dahket dan. Muhto das sáhttet maid váikkuhusat.
– Biikakeahtes deahkain ii leat liikká buorre coakcu go geassedeahkaid, earenoamážit njuoska luotta alde. Vaikke vel goike luottas čierasta biila guhkelii go leat biikkakeahtes dálvedeahkat. Dat sáhttá heaggavárálaš jus fáhkka šaddá goazastit, lohká Tennefoss.
– Olusat vudjet biikkakeahtes deahkaiguin dego livčče birrajagi-deahkat. Dalle badjelgeahččá man várálaš sáhttá dálvejuvllaiguin geasset vuodjit, lasiha son.
Son muittuha maid ahte maŋŋil go lea molson, de ferte čavget skruvaid ođđasit.
