Norgga eiseválddit leat ásahan ođđa doaibmabijuid eastadan dihte covid-19 njoammuma. Buot nuoraidskuvllat ja joatkkaskuvllat leat rukses dásis, ja fágaskuvllain, allaskuvllain ja universitehtain ges lea digitála oahpahus ja olbmot ávžžuhuvvojit maŋidit buot galledemiid čuovvovaš guokte vahkku.
Ráđđehus dáhttu eastadit covid-19 njoammuma maŋŋel juovlaluomu ja ásaha ođđa gáržžidusaid mat doaibmagohtet ođđajagemánu 4. beaivvi ja bistet unnimusat guokte vahkku ovddas guvlui.
– Maŋŋel juovllaid leat unnit olbmot iskkahan iežaset ja seammás leat eanet iskosat positiiva. Njoammun lassána ja leavvá maiddái ođđa guovlluide. Dál bivddán olbmuid čuovvut ođđa ráddjehusaid vai eastadivččiimet njoammuma, lohká stádaministtar Erna Solberg preassadieđáhusas.
Ráđđehus lea mearridan ođđa gáržžidusaid olles riikii Dearvvašvuođadirektoráhta ja Álbmotdearvvašvuođainstituhta ráđiid vuođul. Ulbmil lea eastadit njoammuma ja nannet gielddaid vai nagodit fállat eanet iskkademiid ja gieđahallat báikkálaš koronaleavvamiid.
Sosiála eallin
Ráđđehus bivdá olbmuid ráddjet iežaset sosiála eallima. Olbmot eai berre galledit nubbi nuppi čuovvovaš 14 beaivvi.
Dárbbašlaš ruovttubálvalusat gal sáhttet čađahuvvot ja olbmot geat leat lahka jápmima gal ožžot vuostáiváldit gussiid.
Olbmot geat ásset iehčanassii maid ožžot bovdet dahje galledit ovtta dahje guokte olbmá dahje ovtta dállodoalu.
Mánáidgárdemánát ja mánáidskuvlamánát ožžot galledit eará mánáid mat leat seamma mánáidjoavkkus.
Valáštallan ja astoáigi
Buot astoáiggedoaimmat, valáštallamat, kulturdoalut ja eallinoaidnočoagganeamit, mat lágiduvvojit siste, berrejit maŋiduvvot ođđajagimánu 18. beaivái. Dát guoská maiddái buot lágidemiide mat čohkkejit mánáid ja nuoraid geat eai gula seamma luohkáide ja mánájoavkkuide.
Olgovaláštallamiid gal lea lohpi čađahit jus oasseváldiin lea vejolaš doallat gaskka.
Ođđa gáržžidusat eai váikkut váldovaláštalliide ja kulturdoaimmaheddjiide.
Mátkkošteamit
Olbmot ávžžuhuvvojit maŋidit dahje šluhttet dárbbašmeahttun johtima sihke Norggas ja olgoriikkas.
Olbmot geat gullet seamma dállodollui ožžot mannat barttaide, muhto sii galget čuovvut báikkálaš ja nationála njoammuneastadannjuolggadusaid.
Oahpahus ja bargoeallin
Buot Norgga nuoraidskuvllat ja joatkkaskuvllat leat rukses dásis ja čuvvot njuolggadusaid dan ektui.
Universitehtat, allaskuvllat ja fágaskuvllat čađahit digitála oahpahusa ođđajagemánu 18. beaivái.
Álbmotallaskuvllat ja biibbalskuvllat eai dárbbaš giddet, muhto čuvvot njoammuneastadandoaimmaid.
Bargoeallimis berrejit buhkat bargat ruovttukantuvrras jus lea vejolaš.
Gávppit
Buot gávpeguovddážat ja buvddat berrejit ráddjet galle olbmo ain luitet sisa. Olbmuin galgá vejolaš doallat buori gaskka ja gávppiin galgá čađahit bearráigeahču.
Ráđđehus árvvoštallá ráhkadit láhkanjuolggadusa dán hárrái.
Priváhta čoagganeamit ja lágideamit
Priváhta doaluide, mat lágiduvvojit olggobealde ruovttu, oažžu čohkket vihtta olbmo. Jus ovtta dállodoalus leat eanet go vihtta olbmo, de beassá diehttelasat olles dállodoallu čoahkkanit.
Eanemusat logi olbmo ožžot čoahkkanit valáštallandoaluide, kulturdoaluide, semináraide, eallinoaidnočoagganemiide, seremoniijaide jna. jus lágideamit leat siste. Jus stuolut leat giddejuvvon láhttái, de gal lea lohpi čohkket 200 olbmo. Namuhuvvon lágideamit berrejit gal šluhttejuvvot dahje maŋiduvvot.
Hávdádemiide ožžot 50 olbmo boahtit, ja guoská maiddái dalle jus stuolut eai leat giddejuvvon masa nu.
Olgoeallin
Alkoholaguossoheapmi gildojuvvo buot Norgga olgobáikkiin, guossohanbáikkiin ja doaluin.
Girkostallan
Buot njuolggadusat mat leamaš girkostallama ektui loahpahuvvojit.
Sierra njuolggudusat
Ráđđehus ásaha maid sierra doaibmabijuid maid ávžžuhuvvojit čuovvut gielddain ja guovlluin gos lea olu njoammun.
Gielddain berrejit árvvoštallat lea go dárbu bidjat mánáidgárddiid ja mánáidskuvllaid rukses dássái.
Guovlluin gos lea olu njoammun berrejit olbmuid gohččut geavahit njálbmesoaji almmolaš báikkiin gos ii leat vejolaš doallat unnimusat mehtera gaskka. Olbmuid berrejit maid gohččut bargat ruovttus jus lea vejolaš.
Daid guovlluin berrejit maid gohččut giddet valáštallanguovddážiid, bingolanjaid ja vuojadanhállaid.
