-Almmuhus-
-Almmuhus-
-Almmuhus-
OĐĐASATDál buolašta, iige bival buoril

Dál buolašta, iige bival buoril

-

-

Davvi-Norgga dálkedieđáhusas muitalit iežaset prognosaid boahttevaš 10 beaivái, čájehit ahte buollašat bistet ainjuo dan 10 beaivvi.

Buolašrávvagat

Sii geat olggos leat jurddašan arvat dán vahkkus, berrejit gárvodit bures. Dá moadde rávvaga vel vai it šuvččat:

 

1. Cokka fal gahpira, fáhcaid ja čeabetliinni ja várut vai muođut eai šuvččat.

 

2. Jus guhkemátkái leat vuoddjámin de dohppes fal lieggaváđuid fárrui, lea galmmas vuorddašit veahki jus bártidat dahje biila jáddá.

 

3. Jus leat galbmon go olgun leat leamaš, de doapmal nuollalit olgobiktasiid go lieggasii boađát fas, dalle lieggana rumaš jođáneappot.

Vuossárgga buolaštii fas Sis-Finnmárkkus, Kárášjogas njiejai temperatuvra 30 buolašgrádii ja sidjiide geat eai liiko buollašiidda, ii gávdno gal jeđđehus meteorologain:

– Dál leat buollašat vuordimis, grádat bissot gaskkal 30 ja 40 buolašgráda, muitala Davvi-Norgga dálkedieđáhusa meteorologiijakonsuleanta Trond Robertsen.

 

Nuortin bohte buollašat

Robertsen čilge ahte dál buollašat bohtet nuortin, Sibiras:

– Meteorologat lávejit hállat ahte áimmus lea alladeatta, geassit alladeatta addá báhkaid ja dálvit ges buollašiid ja dát dat boahtá ge Sibiras, dadjá son.

Son muitala alddiineaset leat prognosaid mat čájehit dálkkiid 10 beaivvi ovddasguvlui:

– Ja boahttevaš 10 beaivve galget buollašat bistit, diehttelasat dat prognosa ii leat áibbas sihkkar, ii ainjuo loahpageahčen gal. Sis-Finnmárkkus lea buollašeamos dán vahkku loahpas, gaskavahkus gitta bearjadahkii ja duorastaga galgá leat erenoamáš buolaš, dalle gal grádat lahkonit 40 buolašgráda, čilge son.

 

Riddoguovlluin gal lea bivvalat

Finnmárkku ja Tromssa riddoguovlluin dattetge ii buolaš gal nu sakka, ja dat gal lea lunddolaš go mearraáibmu lea lieggasat lohká Robertsen.

– Doppe gal lea veahá lullebiegga ja sáhttá muohttit veaháš. Erenoamážit Porsáŋggus, Deanus ja Várjjatvuonas sáhttá muohttit duorastaga. Riddoguovlluin gal grádat bissot birrasiid 10-12 buolašgrádas, muhtin sajiin sáhttá leat veahá buollašat, čilge Robertsen.

 

Boazodolliide ja vuotnaguolásteddjiide heahtin

Muhto buollašat eai leat heajut, eai ainjuo Davvi-Norgga dálkedieđáhusa Trond Robertsena mielas.

– Go nie buolaš šaddá de gal lastamáđut jápmet, eat ge dárbbaš daiguin bártidit geassit, leaikkastallá son ovdal go lasiha:

– Muhto eallovuddjiide dieđus ii šatta gal nu somá, iige vuotnaguolásteddjiide, dat ges šaddet vásihit váttisvuođaid buollašiid geažil, go fatnasat jikŋot ja rusttegat galbmojit.

 

Ieš sáhtát čuovvut dálkedieđáhusaid yr.no siiddus.

 

 

-Almmuhus-