Dán vahkkus sádde Válgadirektoráhtta 3,5 miljovnna digitála válgakoartta. – Dat mearkkaša ahte válggat leat čievččestuvvon johtui, lohká direktevra Bjørn Berg.
Borgemánu 10. beaivvi rájes lea vejolaš jienastit ovdagihtii sihke sámedigge- ja stuoradiggeválggaide, muhto dan ovdal sádde Válgadirektoráhtta válgakoartta jienasteddjiide.
– Válgakoarta duođašta vuosttažettiin ahte dus lea jienastanvuoigatvuohta, lohká Válgadirektoráhta direktevra Bjørn Berg preassadieđáhusas.
Válgakoarttas gávdná maid dárbbašlaš dieđuid válgga birra. Dán jagi lea digitála válgakoarta. Dan sáhttá viežžat telefovdnii ja dalle ii leat dárbu dan čálihit báhpárii.
Vejolaš jienastit válgakoartta haga
Jus olbmot čájehit válgakoartta go vulget jienastit, de manná jienasteapmi njuovžilabbot. Dattege ii leat nu ahte ii beasa jienastit válgakoartta haga.
– Jienasteaddjis gáibiduvvo dušše legitimašuvdna mas lea olles namma, govva ja riegádandáhton. Jus dat lea mielde, de beassá jienastit, čilge direktevra.
Berg geažuha maid ahte ii leat vejolaš jienastit neahta bokte, vaikke olbmos lea digitála válgakoarta. Buohkat fertejit boahtit válgabáikkiide ja jienastit báberlihpuid bokte, nu go ovdal.
Ožžot dieđu
Válgakoarttat sáddejuvvojit jienasteddjiid digitála poastakássaide, ja buohkaide sáddejuvvo teakstadiehtu go leat ožžon válgakoartta. Sis geain ii leat digitála poastakássa, sáhttet viežžat válgakoartta valg.no dahje Altinn neahttasiidduin.
Olbmot geat leat dieđihan ahte eai siđa poastta sáddejuvvot digitála hámis ja sii geat eai leat ođasmahttán dahje duođaštan iežaset oktavuođadieđuid maŋimuš 18 mánu, sii gal ožžot ain válgakoartta báberhámis.
Válgadirektoráhtta sádde dáid beivviid badjel 3,5 miljovnna digitála válgakoartta ja birrasii 300 000 válgakoartta báberhámis.
