-Almmuhus-
-Almmuhus-
OĐĐASATDál berret molsut dálvejuvllaide

Dál berret molsut dálvejuvllaide

-

-

Meteorologat dieđihit borgga Sis-Finnmárkui dán vahkkoloahpa.

Ovdal vahkkoloahpa sáddii Meteorologalaš instituhtta fiskes váruhusa. Olles Finnmárkui dieđihit muohttaga dán vahkkoloahpa. 

Sotnabeaivve  borgan vielgadin

Meterologa Ola Mellem dadjá Ávvirii ahte lávvordaga ii oro gal vuos galgame muohttit,  muhto eahkeda mielde ja sotnabeaivve  šlahttigoahtá ja dađistaga bohtet borgačalmmit. 

Olles fylkkas leat vurdon galbmasit temperatuvrrat lagamus beivviid, ja galbmaseamos šaddá ge Sis-Finnmárkkus.  Vaikko Sis-Finnmárkkus ii leat nu olu arvi ii ge šlahtti beaivet lávvordaga,  de čoskkiida ija mielde ja  sotnabeaivve. 

– Lea dieđihuvvon oarjedavvebiegga biegga ja šlahtti mii jorrá borgan sotnabeaivve mielde, dadjá Mellem. 

Sáhttá várálaš jus ii ráhkkan

Ola Mellem rávve olbmuid dál jurddašit siivvu birra jus fertejit biillain vuodjit.

– Lea vurdon  muohttit 5-10 sentte ovtta jándoris Finnmárkkus. Ii leat nu olu, muhto sáhttá dieđusge buktit hástalusaid jus ii leat ráhkkanan dasa, dadjá meteorologa. Son ávžžuha biillas molsut dálvejuvllaide jus ii leat vel molson dássážii. 

Bivalda gal fas

Leat goitge stuora erohusat  fylkkas. Riddoguovlluin ii jáhke meteorologa vel boahtit borgga vuolládagain. Sáhttet vehá šlahtteoavttit gal boahtit. Muđui lohká vehá bivaldeame fas mánnodaga. 

-Almmuhus-