Buot Davvi Dearvvašvuođa pasieanttat besset lohkagoahtit iežaset journálaid elektrovnnalaččat. Geahččalanprošeavtta oasseváldi ávžžuha geavahit ođđa fálaldaga.
Buot Davvi Dearvvašvuođa pasieanttat besset lohkagoahtit iežaset journálaid elektrovnnalaččat. Geahččalanprošeavtta oasseváldi ávžžuha geavahit ođđa fálaldaga.
Čavčča rájes besset buot Davvi Dearvvašvuođa pasieanttat geavahišgoahtit bálvalusa interneahtas mas oaidná olles iežas pasieantajournála. Davvi-Norgga Universitehta buohcciviesus leat 500 pasieantta geahččalan ođđa ortnega. Oasseváldi Marianne Hofstra lea duhtavaš.
– Bálvalus orro hui buorre, mun lean jo ustibiid ja oahppásiid ávžžuhan geavahit dán. Interneahttasiiddus gávdná olu dieđuid ja dan lea álki geavahit. Olbmuide šaddá maiddái olu álkit lohkat iežaset journála. Mun aŋkke lean hui duhtavaš, lohká son.
Báhpáris internehttii
Maiddái dál lea pasieanttain riekti lohkat iežaset pasieanttadieđuid, muhto dalle gártá dáid diŋgot skerrui dahje báhpirii. Ođđa ortnet bokte ii dárbbaš olmmoš go logget helsenorge.no neahttasiidui. Preassadieđáhusas čállá Davvi Dearvvašvuohta ahte ođđa bálvalus gokčá pasieantavuoigatvuođaid seamma láhkai go dál.
– Mii leat ain dárkkisteamen ođđa neahttačovdosa, go dát dohkkehuvvo de besset buot Helgelándabuohcciviesu, Nordlándabuohcciviesu, UNN ja Finnmárkubuohcciviesu pasieanttat lohkat journálaid elektrovnnalaččat, lohká prošeaktajođiheaddji Tove Sørensen.
Ii bala váilevaš sihkkarvuođas
Eanet ja eanet bálvalusat fállojuvvojit interneahta bokte dán áigge, Davvi Dearvvašvuohta almmuha ođđa vuogádaga go servodagas leat vuordámušat lohkat journálaid elektrovnnalaččat. Geahččaleaddji ja pasieanta Marianne Hofstra jáhkká ođđa bálvalusa sihkkarvuođa buorren.
– Muhtimat dáidet ballat váilevaš sihkkarvuođas, muhto mu mielas orro oadjebas geavahit ođđa bálvalusa. Neahttasiidui sáhttá logget earret eará Altinn geavaheaddjikontoin ja doppe han gávdnojit jo olu persovnnalaš dieđut olbmo birra. Mun jáhkkán neahttabálvalusa doaibmat buoret go dálá ortnega, lohká son.
Nanne mielváikkuheami
UNN-direktevra Tor Ingebrigtsen oaivvilda bálvalusa buorrin sihke pasieanttaide ja dearvvašvuođasuorggi bargiide.
– Lea buorre go leat ovddidan dán rusttega. Ođđa čoavddus buoreda pasieanta vejolašvuođa čuovvut iežas dearvvašvuođa ja dasa lassin nanne dát pasieanta mielváikkuheami. Pasieanttaid váikkuheapmi ja mearridanvejolašvuohta gáibida dearvvašvuođabargiin eanet ja sii šaddet eanet dihtomielalaččat čállit journálaid, seammás buorida dát olbmuid luohttevašvuođa dearvvašvuođalágádussii, lohká son.
Vuosttáš Norggas
Davvi Dearvvašvuohta lea vuosttaš mii fállá elektrovnnalaš bálvalusa pasieanttaide. Prošeavtta eaiggáduššá Davvi Dearvvašvuohta, eará oasseváldit leat Dearvvašvuođadirektoráhta, Davvi Dearvvašvuođa IKT, eará dearvvašvuođavuogádagat, ovttasdoaimma ja teledálkodeami Našunála guovddáš ja DIPS ASA.
– Bálvalus galgá stuoriduvvot, earret eará galgá neahttasiiddus gávdnat dieđuid doavtterdiimmuid birra ja interneahtas galgá maid beassat dáid rievdadit, čállá Davvi Dearvvašvuohta preassadieđáhusas.
