Juohke jagi leat badjel miljovdnabeale personbiilla lihkohisvuođain. Jus bártida, de gánnáha deavdit vahátdieđáhusa ja sáddet dan iežat dáhkádusfitnodahkii. Dál sáhtát digitálalaččat dahkat dan, dorvvolaččat ja álkit.
– Dál ii leat šat dat váttisvuohta ahte peanna- ja báberčoavddus bisseha du sáddemis biilavahágiid sisa, dadjá NAF buvttadanoamasteaddji Espen Andreassen.
NAF háliida geahpidit vahátdieđáhusa deavdima, ja dál it dárbbaš šat jurddašit lea go dus peanna ja bábir biillas jus geavat bárttiid sisa. Dál gávdno digitála čoavddus dasa.
– NAF lea guhká oaidnán dárbbu digitála čovdosii. Mii sávvat ahte dainna čovdosiin eai dárbbaš vuoddjit dovdat huša ja unohisvuođa dakkár dilálašvuođas mii sáhttá leat suorggahahtti, dadjá Espen Andreassen.
Álki deavdit – mii viežžat dieđuid
Vahátdieđáhus berre devdot lihkohisvuođabáikkis, ja danne lea NAF vuoruhan mobiilaovttadagaid go leat ráhkadan dakkár digitála čovdosa.
– Eatnasiin lea telefovdna mielde go leat vuodjime. Dat čoavddus lea ráhkaduvvon nu vai lea álki deavdit unna telefuvnnažiin maid, deattuha Andreassen.
Jus guokte biilla leat lihkohisvuođas, deavdiba goappašagat goabbatge siiddu. Čoavddus lea čadnon Stáhta geaidnodoaimmahaga vuogádagaide ja viežžá biiladieđuid registrerennummaris.
– Dán lea hui álki geavahit, ja das leat maid buorit čilgehusat buot osiin mat galget devdojuvvot. Olu dieđut vižžojuvvojit automáhtalaččat go registrerennummara ja telefonnummara deavddát. It dárbbaš áppa ge lástet, visot lea neahttasiiddus, loahpaha Espen Andreassen.
Vahátdieđáhusa gávnnat go ozat skademelding.naf.no.
