Diibmá gárte álddagasbárttit divrrasin ja mákse badjel 100 miljovnna ruvnno. Borgemánnu lei vearrámus.
Diimmá geasis gevve 60 proseantta buot álddagasvahágiin Norggas, čájehit Finans Norge logut.
– Logut maid mii oaidnit dollet deaivása, dadjá Frende Forsikring buollinekspearta Øystein Øren.
Dán fylkkas lei divraseamos
Finans Norge loguid mielde ledje dan fylkkas mii ii šat gávdno divraseamos álddagasvahágat 1985:s 2019:i, namalassii Hordalánddas. Olles 19 554 vahága, mat mákse 498 349 miljovnna ruvnno. Nuppi sajis lea Akerhus. Finnmárku lea gitta vuolimus dáin loguin, das bajábeale fas Romsa.
Trøndelága fylka lea oalle badjin listtus, viđat sajis. Nordlánda lea fas guđadin maŋimuš.
Dán galggat bargat go álddagastá:
– Installeret gealddasuoji sihkkarastinskábii.
– Gaikkihit eret el-čuggestagaid.
– Geavat olgguldas láddára ja dihtora.
– Muitte ahte álddagastá eanaš allodagas (Ale mana bajimus čohkkii jus leat ovdamearkka dihte váris).
– Lea dorvvoleabbo biillas go olgun.
– Ale mana čáhcái lávggodit.
– Geavat mobiltelefuvnna ovdalii dábálaš telefovnna.
Dihtet go?
Álddagastá eanemusat Siskkit Østfoldas ja Finnmárkkuduoddaris.
Sáhttá álddagastit oaktebalvvas, muhto maiddái eatnamis ja bajás balvvaide.
Bajánjietna boahtá das go álddagas ligge áimmu álddagaskanálas ja liegganeapmi geavvá jođánit. Dasto fas galbmo seamma jođánit liegganeapmi ja galmmisteapmi addá jietnabáruid, mii de dagaha bajána.
