Mánnodaga iđida rájes besset finnmárkulaččat iežaset oaivila cealkit, das galggašii go Finnmárku ovttastuvvot Romssa fylkkain.
Mánnodaga iđida rájes besset finnmárkulaččat iežaset oaivila cealkit, das galggašii go Finnmárku ovttastuvvot Romssa fylkkain.
Stuoradiggemearrádus oktiičaskit Finnmárkku ja Romssa fylkkaid lea suhttadan olbmuid. Iskkadeapmi, man Sentio čađahii NRK ovddas árabut dán jagi, čájehii ahte 86 proseantta álbmogis eai leat mielas dan mearrádussii.
Romssas fas vástidedje 73 proseantta ahte eai leat mielas. Muhto Romssa beale ráji ii leat liikká riedja, ja álbmotjienasteapmi lea dušše Finnmárkku bealde.
55 000 besset jienastit
– Olbmot áŋgiruššet dán áššis. Sávan ahte olusat servet jienasteapmái. Alla oassálastin nanne jienasteami legitimitehta, lohká fylkkavárresátnejođiheaddji Tarjei Jensen Bech NTB:i.
Finnmárkku politihkalaš jođiheapmi lea bivdán čoahkkima stádaministariin Erna Solbergiin nu jođánit go boađus lea gárvvis.
– Lean oalle sihkar ahte lea stuora eanetlohku «ii» bealde. Min sávaldat lea jorgalahttit ovttastahttima. MIn mielas ii leat buorre ovttastahttit guokte fylkka go ii okta ge hálit dan, lohká Bech.
Birrasii 55 000 finnmárkulaččas lea lohpi jienastit álbmotjienasteamis. Ferte álbmotregistrerejuvvon čujuhus Finnmárkkus ja ferte deavdit unnimusat 18 jagi dán jagi.
Ovdalgihtii jienasteapmi
Mánnodaga diibmu logis lea vejolašvuohta jienastit interneahtas. Dat buot áŋgirepmosat sáhttet válgabáikkiin jienastit diibmu gávcci rájes juo.
– Mis lea systema mii váruha ahte olbmot eai jienas guktii, jus lea juo jienastan interneahtas, ja nuppes jienasta válgabáikkis, de sihkkojuvvo interneahta jietna. Ii galgga sáhttit fillet systema. Sáhttá máŋgii jienastit neahtas, muhto lea dušše maŋemuš jietna mii lohkko, lohká Harald Hereide, fylkkaválgastivrra čálli.
Ovdagihtiijienasteapmi loahpahuvvo miessemánu 11. beaivvi. Válgabeaivvi leat válgabáikkit rahpasat eahkedii, dan sáhttá oaidnit Finnmárkku fylkkagieldda neahttasiidduin.
Eai prognosat
Gaskaboddosaš boađus čielgá easka miessemánu 15. beaivvi eahkeda, dahje nuppi iđit. Jienat mat álggos lohkkojit báikkálaš jienastanbáikkiin, sáddejuvvojit válgastivrii geat fas isket bohtosa. Loahpalaš boađus ii čielgga ovdal go moadde beaivvi maŋŋil.
– Goas boađus čielga boahtá das man jođánit suohkaniin nagodit lohkat jienaid, lohká Hereide.
Eai ráhkaduvvo prognosat dahje gaskaboddosaš logut logadettiin.
(©NTB)
