Dákkár lea bávkkehan telefuvdna oaidnit

Nisu lei oalle ládje suorganan, go gullái go telefuvdna bávkkehii. Sus lei telefuvdna seaŋggas, ja nu lea ge oallugiin, go oallugat lohket dieđuid ovdal go nohkket, ja earát fas guldalit musihka.

Muhtumat atnet telefuvnna boktimii.

– Lei Samsung S3 telefuvdna mii bávkkehii ja buollái, lohká Frende dáhkádusfitnodaga buollinhoavda Odd Magne Skjerping preassadieđáhusas.

Lihkku go gullái

Son lohká ahte lei lihkku telefuneaiggádis, go gullái ja ollii bálkestit sihke gávnniid ja mobiltelefuvnna čáhcái.

– Mobiila bolddii čiekŋalis rokki guoddái. Telefuvdna ii lean láddeme ge, lei báhtter mii bávkkehii, lohká Skjerping. Dolla ii beassan leavvat, ja dáhkádusfitnodat buhtadii sihke seaŋgga ja telefuvnna.

Juohke jagi leat logi viessobuollima telefuvdnaláddáriid geažil. Dan čájehit servodatsihkarvuođa ja gearggusvuođa direktoráhta logut. Dasa bohtet vel lassin dakkár buollimat maid olbmot ieža čáskadit, eai ge soaitte dieđihit.

Dárbbašmeahttun várra

Skjerping lohká ahte jus fuobmát ahte telefuvdna lea hui báhkas, dahje ahte duogábealde bullága, de gánnáha leahkit várrogas, ja doalvut iskkadeapmái.

Son oaivvilda ahte lea nu várálaš elrávdnjerusttegiid atnit seaŋggas, ja lea áibbas dárbbašmeahttun.

– Mirkosuovva rusttegiin lea liikká várálaš go ieš dat dolla. Jus leat oađđime, de it mearkkaš várálašvuođa ovdal go lea beare maŋŋit, lohká Skjerping.

Son ávžžuha ahte olbmot eai ládde telefuvnnaid ja eará rusttegiid ihkku. Lassin vel ávžžuha ahte go bidjá láddet, de ii guođe telefuvnna man ge ala mii álkit buollá.