Dán ovddas lea Det Norske Travselskap dubmen muhtin finnmárkulačča eret doalvegilvvuin boahttevaš njeallje jagi. Duopmu ii leat vuos fámus.
Dán ovddas lea Det Norske Travselskap dubmen muhtin finnmárkulačča eret doalvegilvvuin boahttevaš njeallje jagi. Duopmu ii leat vuos fámus.
Det Norske Travselskap (DNT) riektelávddegoddi lea miessemánu 15. beaivvi ovttajienalaččat dubmen muhtin finnmárkulačča massit miellahttuvuođa ja vuoigatvuođaid njealji jahkái.
Son lea maiddái massán rievtti oassálastit doalvegilvvuide, dahje hárjehallat báikkiin maid DNT eaiggáda dahje ruhttada. Duopmu ii leat vel fámus go lea ain guoddalanáigi. Finnmárkulaš ii hálit kommenteret ášši Ávvirii.
«Dájáskan»
Duogáš duomus lea go Davvi-Norgga Doalvelihttu lei váidán guokte dáhpáhusa, mat leat geavvan Harstad doalvešiljus, gos finnmárkulaš galgá leat juhkan, rikkeren ja čájehan heajus olmmošvearu.
Vuosttaš dáhpáhus geavai 2013:s, go son buohccái váimmu geažil ja šadde bivdit ambulánssa boahtit báikái. De galgá son leat «dájáskan ja veahkaválddálaččat láhtten almmolašbálván», dán ovddas lea maid dubmehallan Trondenes diggegottis, čállá DNT riektelávdegoddi duomus.
Davvi-Norgga Doalvelihttu dalle njálmmálaččat celkii sutnje ahte dát ii leat dohkálaš láhttenvuohki doalvešilljus.
Ii leat addán iežas čilgehusa
Nubbi duođalaš dáhpáhus geavai measta jagi maŋŋá, dalle galgá son leamašan vuot juhkan, láhtten ja cealkán unohas sániid eret eará mánáide geat idjadedje doalvešiljus gilvvuid oktavuođas.
DNT riektelávddegoddi lea meannudan váidaga, iige finnmárkulaš leat beroštan addit iežas cealkámuša čuoččuhusaide, nu lea diggelávddegoddi áššemeannudeames deattuhan ahte dáhpáhus galgá leat geavvan, nu go boahtá ovdán váidagis.
Addán váruhusa
Davvi-Norgga Doalvelihttu jođiheaddji Jan Ottar Østring mielas lea váivves ášši, ja lohká doalvebiras ii leat beare stuoris ja buohkat leat oahppásat, muhto dáhpáhusat leat beare roavva ja lei váttis badjelgeahččat daid.
– Ii leat eaŋkal dáhpáhus, muhto lea máŋgii dáhpáhuvvan. Vuosttáš háve attiimet váruhusa, gos son lohpidii heaitit juhkamis alkohola min doaluid oktavuođas. Attiimet dalle čielga dieđu ahte jus nuppes dáhpáhuvva, de váidit du, lohká Østring.
– Dohkketmeahttumis láhtenvuohki
Østring lohká finnmárkulačča láhtenvuogi ja sátnegeavaheami roavisin ja duođalažžan, muhto ii hálit almmuhit makkár sániid lea geavahan.
– Lea cealkán roavva seksuála dajaldagaid mánáide, ja son leamašan nu juhkan ahte ii leamašan vejolaš oažžut oktavuođa suinna. Ja dakkár láhtenvuohki ii leat dohkálaš, lohká son.
Jan Ottar Østring mielas lea olles ášši váidalahtti, muhto čilge go olmmoš čohkká ámmáhin de lea geatnegáhtton váidit dákkár dáhpáhusaid.
– Mii galgat doalahit luohttámuša, ja mii nu go earát ge servodagas galgat láhttet albmaláhkai. Ja go mánát ballet deaivamis su, de lea ášši mannan menddo guhkás, loahpa son.
Ávvir ii leat fidnen DNT duopmolávdegotti ságaide kommenteret duomu.
