-Almmuhus-
KULTUVRADáinna lávlagiin ii beassan SGP:i

Dáinna lávlagiin ii beassan SGP:i

Journalista

-

-

Go ii beassan mielde Sámi Grand Prix gilvui, de almmuhii baicce musihkkavideo YouTubii. Geahča video áššis.

Son govvida iežas ain amatevramusihkkárin, ja muitala dien dáfus buorebut almmuhit ođđa šuoŋa interneahtas go ovdanbuktit dan Sámi Grand Prix lávddis beassášlávvardaga.

 – Livččen balus, ja dien dáfus lea buorre go in válljejuvvon finalisttaid searvái. Go hárjánan lávddis, de soaitá suohttaset iežas dieđihit lávlungilvui, muitala Alvvat soloartistta Petri Eskonsipo.

 

Sámegillii lávlugoahtán

Petri lea čuojahan iešguđetlágan instrumeanttaid mánnávuođa rájes, muhto easka guovtti jagi áigi fuomášii geavahišgoahtit eanebuš áiggi musihkkii. Beaivválaččat bargá son doavttirin, muhto buot friddjaáiggis geavaha musihkkii. Son lea ráhkadan šuoŋaid sihke dáro- ja eŋgelasgillii, šuokŋa «Dieđán» lea su vuosttaš sámegiel lávlla.

 – Orun lihkostuvvan ja dovddan iežan duhtavažžan. Dál háliidan buot iežan lávlagiid heivehit maiddái sámegillii, muitala Eskonsipo.

 

Sámi duogáš mii ii dohkkehuvvo

Petri Eskonsipo lea eret Ávžžis (Autti suomagillii) Suomas, muhto ássá Romssa gávpogis. Son muitala alcces sámi máttuid, muhto ahte báhpára alde ii dohkkehuvvo sápmelažžan.

 – In deavdde eavttuid leat sápmelažžan vaikke eadni bealde leat mus sámi máttut. Dovddan goit iežan seamma sápmelažžan go mu eamit, gii lea Guovdageainnus eret, čilge son.

 

Lunddolaš

Su ruoktu lea golmmagielat, son ja su eamit sihke sámásteaba, suomasteaba ja dárusteaba iežaska golmma mánnái. Danin lei Petri Eskonsipoi áibbas lunddolaš maiddái sámegillii lávlugoahtit. Son lea maiddái iežas joavkku gásttašan sámi namain.

 – Alvvat galgá symboliseret hutkáivuođa, čilge Eskonsipo.

-Almmuhus-