Go dálkkit ja temperatuvrrat rievddadit, de lea stuorát riska ahte biilla automáhtalaš mekanismmat billahuvvet.
Ollu ođđaáigásaš biillain gávdno dakkár funkšuvdna ahte biilla speadjalat mannet automáhtalaččat sisa guvlui ja olggosguvlui go lásset ja rabat biilla. Muohta ja jiekŋa sáhttá dán mekanismma billistit biillas, ja sáhttá divrrasin gártat jus speadjalat jikŋot ja šattat divohussii doalvut biilla.
– Muhtun biillain ferte olles speadjala molsut go mekanisma billahuvvá, dahje jus oasáš speadjalis ii gierdda dan go mohtor vigga olggos guvlui máhcastit jikŋon speadjala. Go mii diehtit man ollu elektronihkka dálá biillain leat speadjaliin sihke liegganeapmái, rávkečuovggaide ja kámeraide, de sáhttá gártat divrrasin daid divodit. Dat lea dárbbašmeahttun olggosgollu go dan sáhttá garvit, dadjá NAF ráđđeaddi Jan Harry Svendsen.
Gávdno čoavddus
NAF:s lea álkes vuohki movt váruhit ahte speadjaliid mekanisma ii billahuva.
– Buot biillain, main leat speadjalat mat automáhtalaččat máhccasit olggos- ja sisaguvlui, lea boallu mii jáddada dan funkšuvnna. Deaddil dan boalu ja garvve divrras rehkegiid, dadjá Svendsen.
