-Almmuhus-
OĐĐASAT – Dáiddaskuvla ferte buoridit rekrutterema

– Dáiddaskuvla ferte buoridit rekrutterema

-

-

Fylkkagielda ja gielda leat ain árvvoštallame addet go Kárášjoga Dáiddaskuvlii ruhtadoarjaga vai cevzet dán skuvlajagi. Jus addet, eaktudit ahte buoridit rekrutterema.

Lávvordaga čálii Ávvir ahte Kárášjogas dáiddaskuvla soaitá šaddat giddet uvssaid dán skuvlajahkái jus eai oaččo ruđalaš heahteveahki dál hui jođánit. Dán skuvlajahkái dárbbašit oktiibuot 630.000 ruvnno. Vástádusa fertejit oažžut juo gaskavahku 25. beaivvi skábmamánus.

Studeantalohku Kárášjoga dáiddaskuvllas 2011-2015:

2011/12: 11 studeantta álge, 9 čađahedje

2012/13: 12 studeantta álge, 12 čađahedje

2013/14: 12 studeantta álge, 10 čađahedje

2014/15: 9 studeantta álge, 7 čađahedje

2015/16: 6 studeantta álge (dušše vuosttaš luohkkái)

Galggaše gal

Finnmárkku fylkkavárresátnejođiheaddji Ragnhild Vassvik (Bargiidbellodat), gii maid lea Kárášjoga politihkkár, lohká skuvlla áinnas fertet bisuhit.

– Lea dehálaš geahččalit skuvlla gádjut. Dat lea mu oaivil vaikko in dál lohpit ahte mii gávdnat ruđa. Ášši ii leat leamaš vel digaštallamis, ii ge leat makkárge áššelisttus. Muhto mun lean bargame oažžut čoahkkimiid ja geahččame leago várri bidjat liige ruđaid dasa, dadjá son.

Vassvik ii loga fylkkagielddas gávdnot makkárge friddja ruđat, muhto dás lea hoahpporuđaid birra sáhka ja de leat eará čovdosat.

 

Eaba oaččo šat bálkká

Dál lea duođalaš dilli. Skuvlla guokte bargi, rektor gii lea 80 proseantta virggis ja oahpaheaddji 50 proseantta virggis, eaba leat ožžon čakčamánu rájes bálkká. Oahppodirektoráhtta lea maid gáibidan 164 097 ruvnnu ruovttoluotta go skuvllas leat beali unnit oahppit go dan maid skuvla giđđat lei dieđihan dohko álget.

 

Sámediggi áiggošii veahkehit

Sámediggi lea lohpidan máksit 250.000 ruvnno, muhto leat bidjan eaktun ahte earát maid servet, nugo gielda ja fylkkagielda. Dáiddaskuvlla jođiheaddjit leat ge váldán oktavuođa sihke Kárášjoga gielddain ja Finnmárkku fylkkagielddain. Gielda lea árvvoštallame ja nu maid fylkkagielda. Dáiddaskuvlla stivra lohká dárbbašit čálalaš dieđu juo ihttin gaskavahku. Dat gal lea Vassvik mielas beare oanehis áigi.

– Sii ledje berret buoret áiggis jearrat veahki. Ja ferte maid digaštallat movt skuvla háhká ođđa ohppiid ja leago skuvllas boahtteáigi, dadjá Vassvik.

 

Eavttuid bidjat

Fylkkadiggeáirras ja Kárášjoga ovdagotti lahttu Anne Toril Eriksen Balto (Guovddášbellodat) lea ovttaoaivilis ahte galggašii doarjut skuvlla. Son lea ávžžuhan lávdegotti masa ášši gullá, doarjut dáiddaskuvlla. Muhto son maid oaivvilda ahte ferte sáhttit eavttuid bidjat dáiddaskuvlii.

– Dáiddaskuvla ferte eambbo márkanfievrridit iežaset, oažžut eanet ohppiid olles riikkas, Ruđain fertejit čuovvut gáibádusat ahte bidjet eambbo návccaid dasa, dadjá son.

 

Eai suitte almmuhusaid

Skuvlla rektor Eva Aira ii loga sin áidna dáiddaskuvlan mii rahčá oažžumis doarvái studeanttaid.

– Eará dáiddaskuvllat maid rahčet birra máilmmi ja miehtá Skandinavia, go juste dál ii leat govvadáidda nu bivnnut. Mii fertešeimmet gal oažžut eambbo studeanttaid, muhto in dieđe vástidit leat go mii doarvái čeahpit rekrutteret, go mis ii leat buorre ruhtadilli ja eat ge sáhte oastit almmuhusaid ja mátkkoštit. Muhto dieđusge fertejit bidjat eavttuid ruhtii dál. Mii fertet beare geahččalit, dadjá Aira.

 

 

- Advertisement -
-Almmuhus-