Holmberg doalvvui Sámi riektegažaldagaid Ovttastuvvon gonagasgotti parlamentii.
Dáiddár ja aktivista Niillas Holmberg doalvvui mannan vahkus Sámi riekteságastallama Ovttastuvvon gonagasgotti parlamentii, go parlameantta lahttu Catherine West bovdii su muitalit sámiid dili birra.
–Ságastalaime earret eará Deanu soahpamuša ja Suoma guolástanlága birra, mat leat áigeguovdilis ovdamearkkat min olmmošvuoigatvuođaid rihkkumis, muitala Holmberg preassadieđahusas.
Ávkin sámi áššiide
Catherine West lea Labour -bellodaga lahttu, gii lea spesialiseren riikkaidgaskasaš olmmošvuoigatvuođaide. Holmberg mielas riikkaidgaskasaš fuopmášupmi sáhtašii leat ávkin Sámi áššiide.
– Min jietna ii gullo dain riikkain, mat oamastallet Sámi ja vigget jienajávohaga rievidit min rivttiid. Mu jáhkán ahte riikkaidgaskasaš fuopmášupmi sáhtášii deaddit stáhtaid várrugasvuhtii.
Duđavaš
Holmberg lea duđavaš ságastallamii Westain.
–Dál go Ovttastuvvon gonagasgoddi BREXIT:a maŋŋá geahčada ođđasit gaskavuođaidis eará riikkaide, de lea liiba jearrat gažaldagaid. Catherine West lohpidii váldit min ášši ovdan parlameanttas ja erenoamážit olgoriikkaid ministariin Boris Johnsoniin.
Holmberg gullá Ellos Deatnu lihkadussii, mii bargá ovddidit sámiid iešmearrideami Deanus.
