Magnus Vuolab lea musihkkabuvttadeaddji gii lea fuomášan lágidit konseartta veahkehan dihtii Kárášjoga dáiddaskuvlla.
Magnus Vuolab lea musihkkabuvttadeaddji gii lea fuomášan lágidit konseartta veahkehan dihtii Kárášjoga dáiddaskuvlla.
Kárášjoga dáiddaskuvla lea váttis dilis go váilu ruhtadeapmi. Ávvir lei mannan vahkus čállán ahte Dáiddaskuvla lea ohcan dál sihke Sámedikkis, Kárášjoga gielddas ja Finnmárkku fylkkagielddas guđesge 250 000 ruvnno doarjaga, oktiibuot 750 000 ruvnno vai sáhttet čađahit dán skuvlajagi.
Magnus Vuolab ieš orru Kárášjogas ja lea musihkkabuvttadeaddji. Iežas ii loga duhtavažžan dainna go skuvla ja oahppit galget gillát.
– Jurdda lea čohkket musihkkariid mielde ja doallat konseartta. Konseartta sisaboahtu galgá mannat Kárášjoga dáiddaskuvlii veahkkin, muitala Magnus Vuolab Ávvirii.
Su oainnus buot dienas manná skuvlii ja artisttat das eai dine maidege.
– Mun lean jo humadan Ammun Jonskarengiin, Terje Tretnesiin, Piera Sombyin, Eva Jeanette Iverseniin ja muhtin earáiguin. Sii servet konsertii. Maiddái lean vuordime dieđuid Felgen Orkesteris ja Intrigues. Dieđus lávddi alde gávdno sadji eambbosiidda. Mađi eambbosat, dađi buorebun šaddá, lohká Vuolab.
Vuolab lohká maiddái ahte áigu juigiiguin gullahallat. Artisttat čuojahit ja lávlot nuvttá, ja ieš buvttadeaddji lohpida ordnet visot mii guoská lávdái nu mo čuovggaid, mikrofovnnaid ja eará diŋggaid. Lágideddjiid mihtu lea geahččalit čoaggit 250 000 ruvnno konsearttas.
– Veahkehit nubbi nuppi
Musihkkabuvttadeaddji lei vuos váldán oktavuođa dáiddaskuvllain gullan dihtii mo váldet vuostá dan jurdaga.
– Mii leat deaivvadan skuvlla rektoriin vuos. Dieđus skuvllas illudit go mii báikkálaš olbmot beroštit mo manná skuvllain. Ieš ge jurddašan ahte dáiddár galgá veahkehit nubbi nuppii. Mii han buohkat leat ovtta ládje dáiddárat leažžá dal musihkkar vai filbmadahkki, lohká Magnus Vuolab.
–Livččii buorre ovdal juovllaid
Áigumušaid mielde konseartta livččii vuogas lágidit ovdal juovllaid.
– Dieđus livččii buot buoremus doallat dán konseartta ovdal juovllaid, muhto lokála dáfus lea veahá váttis go sihke hálla ja servodatviesu leat várrejuvvon juovlabasáraide. Danin jus ii šatta konsearta dál, de lágidit ođđajagemánu vuosttaš vahkku, muitala Magnus Vuolab.
