Sámepedagogihkka ja psykologalaš iešmearridanteoriija lea vuođđun govvačájáhusa fáttás mii rahppo boahtte vahkku Sámemusea Siiddas Anáris.
Sápmelaš oahpaheddjiid skuvlejeaddji ja psykologa Tomi Guttorma govvačájáhusa fáttáid vuođđun leat sámepedagogihkka ja psykologalaš iešmearridanteoriija, dieđiha Sámemusea preassadieđáhusas.
Stuorámus áitta
Iešmearridanteoriija mielde olbmo buresbirgejupmi vuođđuduvvu autonomiija, máhttu ja sosiálalaš oktiigullevašvuođa ala.
Guttorm mielde okta stuorámus áitta Sámi servošiid buresbirgejupmái lea, ahte našuvnnalaš lágat ja riikkaidgaskasaš soahpamušat eai ollašuva Suomas eaige muđui Davviriikkain.
Evttoha čovdosa
Govaid bokte son guorahallá, mo sápmelaččain lea vejolaš birget váldokultuvrraid deattu vuolde ja seailluhit ja ovdánahttit sámegielaid ja kultuvrraid.
Čoavddusin daid hástalusaid vuostá son evttoha sámiid dorvun sámi identitehta ja luondduoktavuođa bajásdoallama ja nannema ja árbevirolaš ealáhusaid ja eamiálbmogiid vuoigatvuođaid dorvvasteami.
«Gal mii birget» čájáhusa buvttada Sámemusea Siida lea ja dat lea rabas Siiddas miessemánu 8. beaivvis gitta golggotmánu 6. beaivái.
