Ráđđehus geahpeda dál ráddjehusaid sidjiide geat leat ožžon buot boahkuhemiid, nu mo Álbmotdearvvašvuođa Instituhtta lea rávven.
Trøndelága stáhtahálddašeaddji dieđiha preassadieđáhusas ahte buohkat geat leat ožžon buot boahkuhemiid Covid-19 dávdda vuostá, eai dárbbaš ruovttus šat doalahit ovtta mehtera gaskka earáide geat maid leat ožžon buot boahkuhemiid. Sis sáhttá maid leat lagas sosiála oktavuohta olbmuiguin geat eai leat boahkuhuvvon ja riskajoavkkus. Almmolašlanjain gusket seamma rávvagat ja njuolggadusat buohkaide, lehkos dal boahkuhuvvon vai ii.
Ráva sidjiide geat leat ožžon buot boahkuhemiid:
Priváhta ruovttuin ja biillain sáhttá sus, gii lea ožžon buot boahkuhemiid, leat sosiála oktavuohta (vuollel 1 mehter gaska) olbmuiguin geat maid leat boahkuhuvvon, vaikko sii leat riskajoavkkus. Sii geat leat ožžon buot boahkuhemiid sáhttet maid deaivat olbmuid geat eai leat boahkuhuvvon ja riskajoavkkus.
Muhto son guhte lea ožžon buot boahkuhemiid, berre ain doallat uhcimus 1 mehtera gaskka olbmuide geat gullet riskajovkui ja eai leat boahkuhuvvon, ja geat eai ása seamma dállodoalus. Almmolašvuođas bissot rávvagat ja njuolggadusat nu mo leamaš: doalahit gaskka, galle olbmo, čorgesvuhtii ja njálbmesuoji geavaheapmái.
