Mánu geahčen ii beasa šat boares 50- ja 500-ruvnnuiguin máksit buvddain. Dáid ferte doapmat golahit dahje cuvkehit báŋkkus.
Golggotmánu 18. beaivvi lea vássan jahki dan rájes go ođđa 50- ja 500-ruvdnosaš báberruđat ilbme ja seamma beaivvi rájes ii beasa šat daid ovddeš báberruđaiguin máksit buvddain.
VG dieđuid mielde gávdnojit ain olbmuin boares 50- ja 500-ruvnnut main lea árvu birrasii 4,8 miljárdda ruvnnu.
Norges Bank ávžžuha E24 ođasdoaimmahaga bokte olbmuid juogo geavahit boares báberruđaid dahje doalvut daid báŋkui ovdal golggotmánu 18. beaivvi.
Jus áigu dáid bidjat báŋkokontoi dahje cuvkehit báŋkkus, de ii leat seamma hoahppu. Dáid sáhttá Norges Bankii doalvut dahje sáddet ain logi jagi ovddasguvlui.
Dán jagi loahpas almmuha Norges Bank maiddái ođđa 1000-ruvdnosaš báberruđa.
(©NTB)
