-Almmuhus-
-Almmuhus-
Beassážat 2022Dáid beassážiidda lea Sami­path leamaš ođđajurdda­šeaddji

Dáid beassážiidda lea Sami­path leamaš ođđajurdda­šeaddji

-

-

Fitnodat geahččala alo ođđa doaimmaid fuobmát. Dáid beassážiid áigot erenoamáš oaggungilvvuid ja doaluid lágidit nuoraide, mii ovdal ii leat lágiduvvon Kárášjogas.

Bearašfitnodagas, Samipath, leat olu iešguđet fálaldagat birra jagi, mat eai leat ovdal fállon Kárášjogas. Geassit ledje hutkan lahta mii govddodii johkagáttis, mas lei lávggodangárri. Dat lei bivnnut olles geasi. Dáid beassážiidda leat maid leamaš ođđajurddašeaddjit. Olles bearaš beassá suohtastallat Kárášjogas dáid beassážiid áigge.

OĐĐAJURDDAŠEADDJI: Samipath beaivválašjođiheaddji, Ammon Piera Nystad, háliida alo geahččalit ođđa doaimmaid maid ovdal ii leat bargan. Priváhta govva.
OĐĐAJURDDAŠEADDJI: Samipath beaivválašjođiheaddji, Ammon Piera Nystad, háliida alo geahččalit ođđa doaimmaid maid ovdal ii leat bargan. Priváhta govva.

– Mun fertejin smiehttat, mii son livčče ođas, somá ja juoidá maid ieš in leat goassege ovdal geahččalan lágidit. Eanaš doaimmaid maid mii bargat leat áibbas ođas buohkaide, midjiide maid. Ja mun jáhkán olbmot leat ohcalan dákkár lágidemiid, dadjá Samipath beaivválašjođiheaddji, Ammon Piera Nystad.

Afterski Kroas

Guhkesbearjadaga lágida Samipath nuoraide Afterski ovddeš Kroas, čierastallanluohkká buohta. 

– Dán áigge lea bivnnut mátkkoštit Levii juohke vahkkoloahpa čierastallat ja juhkat, ja dakkár «afterski vibe» háliidat mii Kárášjohkii maid. Slalomluohkás eat lágit gal maidege, muhto sáhttá dieđusge čierastallat ja čierastit njuolgga Kroai min searvái. Lea oaivvilduvvon vissis olbmuide, muitala Nystad.

– Geat leat dat vissis olbmot?

– Dakkáriidda geat eai mana daid dábálaš beassášdoaluide mat muđui leat Kárášjogas, dakkáriidda geat áigot dušše návddašit ja suohtastallat, bohkosa Nystad ja joatká:

– Lea leamaš stuorra beroštupmi Facebookas ja olbmuin geaiguin muđui lean háleštan. Orro dego juoidá mii lea váillahuvvon.

Samipath lea ovttasbargan Kárášjoga festiválain ja Kjells Kaféain dán lágidemiin. Guokte Kárášjoga DJ:a, Magne Biti ja Irjan Balto, galgaba čuojahit ja Kjells Kafé vuovdá juhkamuša.

Earálágan oaggungilvu

Lassin nuoraiddoaluide, lea Samipath plánen pálbmasotnabeaivái oaggungilvvu Dievaljávrris, muhto ii dušše dábálaš oaggungilvvu gos fertet stađđat oaggut.

– Mii leat buohkat leamaš dábálaš oaggungilvvus, ja mo jus doppe ii oktage gotte guoli? Mii leat plánen eambbo doaimmaid vai šaddá albma olgobeaivi. Doppe sáhttá njuiket jiekŋagalbma čáhcái ja sávnnjodit, šaddet gilvvut ja quizat. Lea dieđusge dábálaš oaggungilvu maiddái.

Nu čilge Ammon Piera Nystad sin oaggungilvvu birra.

OAGGUNGILVU: Dákkár sullasaš tealttá cegge Samipath Dievaljávrái pálbmasotnabeaivvi gos beassá sávnnjodit. Govva: Samipath.
OAGGUNGILVU: Dákkár sullasaš tealttá cegge Samipath Dievaljávrái pálbmasotnabeaivvi gos beassá sávnnjodit. Govva: Samipath.

Samipath cegge oagguntealttá mas lea sávdnjeuvdna ja áigot bovret stuorebuš rutni masa sáhttá njuiket jus bivvá lávggodit jiekŋagalbma čázis. Sáiggas Kennel boahtá ja fállá beanavuodjima.

– Mii smiehtaimet, fertet geahččalit olles bearrašii maid juoidá lágidit, iige dušše feasttaid ja suohtastallamiid nuoraide, muitala Nystad.

– Sávan šaddet jahkásaš doalut

Samipath lea plánen guokte lágideami Kárášjohkii dáid beassážiidda, muhto beaivválaš jođiheaddji muitala ahte soitet fuobmát eambbo suohttasiid lágidit. Son muitala ahte dáid lágidemiid ledje diimmá beassážiidda jo plánen, muhto dál easkka sáhttet ollašuhttit daid.

– Mii ovttasbargat olu olbmuiguin vai dán sáhttit ollašuhttit. Mus eai láve vuoiga nu stuorra vuordámušat vuosttaš háve go maidege barggan, muhto dáidda doaluide jáhkán bohtet olu olbmot ja jáhkán šaddat somá. Mun sávan dáid šaddat jahkásaš doalut, ja maiddái eará lágideamit mat eai leat dábálačča Kárášjogas beassážiid. Mun jáhkán ja sávan mii lihkostuvvat. Mii hal oaidnit mo manná, loahpaha Nystad.

-Almmuhus-