Otná suohkanstivrra vuođđudeami álggus čuoččuhii Dáloniid listtu áirras Isak Mathis O. Hætta, ahte váidon politihkar lea suohkanstivraáirras.
Otná suohkanstivrra vuođđudeami álggus čuoččuhii Dáloniid listtu áirras Isak Mathis O. Hætta, ahte váidon politihkar lea suohkanstivraáirras.
Odne vuođđuduvvui Guovdageainnu suohkana ođđa suohkanstivra njealji čuvvovaš jahkai, 2015-2019. Vuosttaš ášši lei ovdagotti válljet. Ovdal ovdagoddeválggaid válddii Dáloniid listtu áirras, Isak Mathis O. Hætta, sátnevuoru ja dáhtui čuožžilit ovdan dan guovddáš politihkkara guhte lea váidon ovddidan goddináitagiid.
– Olbmot leat jearahallan lean go mun guhte lean váidon, ja danne bivddán ahte dat gii lea váidon dovddasta gii son lea, ja nu čuoččuhii ahte váidon olmmoš lea ođđa suohkanstivrra áirras.
Maiddai Olgeža Mikkel isak Eira, Gurutbellodaga Anton Dahl ja Dáloniid listtu Hans Isak Olsen válde sáni ja dáhtto váidon olbmo boahtit ovdan, dát golmmas ja dálá sátnejođiheaddji Klemet Erland Hætta, maiddái deattuhedje ahte sii eai leat váidon.
Čujuhii politiijakantuvrii ja dáhtui dohko mannat
Johttisápmelaččaid áirras ja joavkojođiheaddji Hans Ole Eira válddii maid sáni, muhto logai ahte ii leat suohkanstivrra bargu dutkat ášši, ja logai dan leat politiijaid bargun.
– Sáhttá válljet vuosttaldit dahje doarjut
Klemet Erland Hætta lohká dán áššis ahte sáhttá válljet ákkastallat vuostá dahje doarjut.
– Mu ipmárdusa lea sáhka makkár luohttámuš lea áirasiidda, ja muhtumiid mielas berre boahtit ovdan ja danne mun suvven maiddái áirasiid váldit sáni, lohká Hætta.
Mikkel Isak Eira lohká sutnje lei dehálaš mannat sárdnestullui ja addit álbmogii dieđu.
– Go lean almmolaš olmmoš ja lean ollu beaggán medias, de lei munnje dehálaš muitalit ahte in leat mun gii lean ovddidan goddináitagiid. In leat dovdan iežan várohuvvon dan áššis, muhto muhtimat soitet jurddašit mun dat lean.
Mii ođastat ášši dađistaga.
