Árja háliida ahte guorahallo makkár vealahemiid sápmelaččat leat vásihan áiggiid čađa.
Árja háliida ahte guorahallo makkár vealahemiid sápmelaččat leat vásihan áiggiid čađa.
Dievasčoahkkimis ikte jearai Árjja Laila Susanne Vars maid sámediggeráđđi lea bargan duohtavuohtakommišuvdna áššiin.
– Ášši leamaš fáddán jahkebealaš čoahkkimis sanneriin, dan čoahkkimis leat ákkastallan manne min mielas lea dárbu dákkár kommišuvdnii. Gielddaministtar ii vástidan njuolga dán áššái, muhto dajai dalle ahte háliida eanet ságastallat vejolašvuođaid birra. Min ipmárdusa mielde ii leat ministtar lohpidan ásahit dákkár kommišuvnna, iige hilgon dan, vástidii sámediggepresideanta Aili Keskitalo.
Ráđi bealis áigot ain čuovvolit ášši.
Sámediggi lea dáhtton ásahuvvot kommišuvnna mii galgá geahčadit makkár vealahemiid sápmelaččat leat vásihan, sihke eaŋkilolbmot muhto maiddái sápmelaččat dego joavkun.
Dákkár guorahallamat leat dahkkon eará riikkain álgoálbmogiid birra, earret eará Kanadas gos bohte ovdan ođđa dieđut.
Norgga bealde lea dákkár guorahallan dahkkon romaniálbmoga dáfus, dan barggus lei Laila Susanne Vars ieš mielde.
Sávvá ráđđehusa čuovvolit
Vars logai leat buorre gullat ahte ráđđi bargá dainna áššiin go lea dehálaš ášši.
– Mun sávan ahte maiddái ráđđehus oaidná dan ahte dál go leat ovtta álbmoga ektui čađahan dákkár guorahallama, ahte sápmelaččaid dáfus maid čađahit dákkár guorahallama, logai son.
Keskitalo lei ovttaoaivilis, muhto logai leat dehálažžan ahte Norgga stáhta ieš álggaha dan barggu go dás lea sáhka daguin maid stáhta lea dahkan.
– Mis lea varra dárbu hukset ákkastallama, mii viggat ain čilge mo dáruiduhttin lea váikkuhan sámeservodahkii, ii leat nu ahte leat geargan dáruiduhttimiin, das leat váikkuhusat odne ain, dajai son.
