Hartvik Hansen dáhtui Deanu gieldda cealkit Stáhta geaidnodoaimmahahkii ahte sii berrejit árvvoštallat sihkkarastit uđasbáikki Leavvajogas dahje sirdit geainnu eret uđasbáikkis.
Deanu gielddastivraáirras Hartvik Hansen evttohii Deanu gielddastivrii ásahit uđassihkkarastima Leavvajohkii dahje sirdit E6-geainnu eret uđasbáikkis.
Uđas duogážin
Hansen evttohii dán dan geažil go mannan sotnabeaivvi fierai uđas Leavvajoga bokte.
Diehtu lei ahte uđas lei unnimusat 200 mehtera govddu, ja doppe sáhttet leat biillat šaddan uđđasa sisa.
Sihke politiijat, ambulánsa ja buollinčáskadeaddjit vuoddjájedje dohko. Johtilit čájehuvvui ahte eai lean biillat uđđasa siste.
Soaittáhat mii dagahii ahte olbmot eai duššan
Dakko bokte lea dábálaš ahte uđas fierrá daid jagiid go lea olu muohta ja Deanu gielddastivraáirras Hartvik Hansen evttohii danne gielddastivrras sihkkarastit uđasbáikki dahje sirdit E6-geainnu.
– Vejolaš lea rievdadit E6-geainnu Leavvajoga bokte. Deanu gielda dáhttu Stáhta geaidnodoaimmahaga árvvoštallat rievdadit geinnodaga uđasbáikkis Leavvajogas dahje árvvoštallat uđassihkkarastima uđasbáikkis E6 buohta. Dát bargu ferte vuoruhuvvot ja ohcat čovdojuvvot johtilit. Dan maŋimuš muohtauđđasis lei dušše soaittáhat mii dagahii ahte olbmot eai duššan, logai Hartvik Hansen gielddastivrras.
Ovttajienalaš Deanu gielddastivra mearridii cealkit Stáhta geaidnodoaimmahahkii ahte sii berrejit árvvoštallat sihkkarastit uđasbáikki Leavvajogas dahje sirdit E6 geinnodaga eret uđasbáikkis.
