Kamilla Elene Samuelsenis lei čielga diehtu ja dáhttu Sámedikki dievasčoahkkima čuovvolit Sámediggeráđi oainnu áššis.
Kamilla Elene Samuelsenis lei čielga diehtu ja dáhttu Sámedikki dievasčoahkkima čuovvolit Sámediggeráđi oainnu áššis.
– Sámedikki dievasčoahkkin ferte jienastit vuostá Nussira ja Gumppenjuni ruvkedoaimmaid, lohká Finnmárkku Luonddu- ja nuoraidlihttu jođiheaddji Kamilla Elene Samuelsen. Son ovddidii iežaset lihtu oainnu Sámedikki ealáhus- ja kulturlávdegotti rabas gulaskuddamis ikte.
Son lohká ášši áŋgiruššat su dan dihte go sus lea dáhttu ja hállu ahte boahttevaš buolvvat galget beassat návddašit vuona nu go ieš lea beassan.
– Mun sávan ahte ruvkedoaibma ii ásahuvvo Fálesnuorrái, muhto ahte vuotna bissu nu go dál ja ahte mu mánáidmánát sáhttet guolástit ja oaidnit luonddu riggodaga. Mu maŋisboahttit berrejit beassat vásihit dan maid mun ja oažžut seamma buriid sihke vuonas ja luonddus, lohká nuorra luondduáŋggirdeaddji.
Guorahallat eará vejolašvuođaid
Kamilla Elene Samuelsen sávvá maid Sámedikki dáhttut guorahallat eará vejolašvuođaid vurket ruvkebázahusaid.
– Sávan Sámedikki dievasčoahkkin vuosttalda Nussira ASA plánaid luoitit ruvkebázahusaid Riehpovutnii. Baicce dáhttut guorahallat buoret vugiid mo sáhttet vurket bázahusaid, loahpaha son.
Loga maid: Ii jáhke ruvkke šaddat duohtan
Loga maid: ÁIDNA GUHTE LEA POSITIIVA ásahit ruvkedoaimma Nussirii
Ávvir ii leat ožžon Sámediggeráđi ságaide kommenteret ievttá rabas gulaskuddama.
