Sosialisttalaš Gurutbellodaga njunuševttohas Porsáŋggu gielddaválggain, oaivvilda gielddaekonomiija njulgema leat hohpolažžan.
Sosialisttalaš Gurutbellodaga njunuševttohas Porsáŋggu gielddaválggain, oaivvilda gielddaekonomiija njulgema leat hohpolažžan.
Cecilie Gjennestad, guhte lea Sosialisttalaš Gurutbellodaga 1. evttohas Porsáŋggu gielddaválggain, lea vástidan Ávvira válgagažaldagaide:
1. Makkár ášši anát don deháleamos válgaáššin din suohkanis?
2. Mii du oaidnu lea dan áššis?
3. Mat leat du váibmoáššit?
– Lea váttis čujuhit dušše ovtta áššái, go leat máŋga dehálaš ášši man birra galggašii ovddidit oaiviliid válgagiččus. Liikká lea mu mielas Porsáŋggu gielddaekonomiija dárbu jođánit buoridit. Mii eat sáhte risikeret ahte álbmot oažžu heajut skuvla-, dearvvašvuohta- ja astoáigefálaldagaid go gielddastivra vuoruha eará áššiid go váldobargguid. Dát galget doaibmat miehtá Porsáŋggu eai ge dušše Leavnnjas, vástida Gjennestad vuosttaš gažaldahkii.
Nuppi gažaldahkii vástida Gjennestad ná:
– Mii Sosialisttalaš Gurutbellodagas oaivvildat ahte Porsáŋgu sáhttá sákka buoridit virgádaneavttuid gielddas. Stuorát bargoveahka mielddisbuvttášii ahte dat geat leat barggus eai váibba nu sákka, hárvvit buohccindieđihuvvojit, buoret fálaldagaid ja luvvešii ruđa buhcciidbálkábušeahtas.
Váibmoáššit
Gjennestadas leat máŋga váibmoášši.
– Porsáŋggu gieldda ruđa ferte buorebut hálddašit, nu ahte lea oadjebas ja stabiila gieldan gos sáhttá ássat ja bargat, dadjá son ja lasiha:
– Dasa lassin fertet nannet dearvvašvuođasektovrra bargoveaga. Eanet áŋgiruššat kultuvrra ja skuvlla ovddas. Atnit boaittobealebáikkiid guovddážis ja hábmet bargosajiid. Olbmot galget háliidit álgit guolásteapmái ja eanandollui min gielddas, dadjá Gjennestad.
